عطوهم فرصة

واحد من اكبر الاغلاط التي نطيح فيها على وجهنا، اننا نحكم على الناس من مظهرهم أو شغلهم أو حتى اسلوبهم في الكلام، وخلوا عنكم سالفة «كل اناء بما فيه ينضح» تراها ماتضبط في كل الاحوال بدليل اني اعرف ناس فيهم اشياء حلوة ووش زينها لكن الله يجزاهم خير محد فيهم قد نضح فيها قبل كذا!
اللي طرا لي السالفة واحد اعرفه وهو شاب عشريني عاطل انقذ اسرة كاملة من حريق وصار بطل بكل معنى الكلمة لأنه عرض حياته لخطر عشان حياة ناس غيره، ومع كل هذا الولد يتكلم بكل بساطة وركادة ولاجلس يهايط لأنه يقول انه سوى هالشي لوجه الله، صح انه مالقى وظيفة للحين ومحطوط على قائمة انتظار فيها الاف الناس.. لكن اللي سواه يكفي عن الف شغلة وشغلة ولا يجازيه عليه الف راتب وراتب!
في ناس تملك اشياء كثير والبلد للأسف مااستفادت منهم لأنه مالقوا فرص عمل، ولو جلست مع الواحد فيهم تلاقيه يملك فكر وحماس ماتلقاها حتى عند المدراء اللي يروح يقدم عندهم، تخيلوا لو هالشاب الشجاع لقى مكان في أي قطاع يناسب قدراته، وبدا يكوّن نفسه ويستقر ويعين خير، وش راح يكون مستوى فايدته على المجتمع؟