المفتاح الضايع.. والطاسة!

الحين اذا فرضنا ان البلدية تداهم المحلات المخالفة وتصحح اوضاعها او تقفلها، ومعنية بالتأكد من سلامة الخدمات اللي تتقدم للناس، طيب وين السياحة عن بعض الشقق المفروشة اللي مافيها ابسط مقومات النظافة او الاهتمام، يعني بالعربي لو تفرش لك سجادة في رصيف والا في حديقة، يمكن تحس بأجواء فندقية وخدمات احسن!
تكون حاجز غرفة قبل وقت كافي، تكتشف انها راحت لغيرك، ومو بعيدة يدفعونك انت الحساب لأنك ماتدري وش النظام اصلا، بعد ماتنلطع وقت كافي في الاستقبال، يجيبوا لك مفتاح غرفة بديلة، ويقوللك انتظر فيها شوي لين ندبر لك الوضع عشان المفتاح ضايع، وخذ لك على هالموال والانتظار الطويل وانت جاي اصلا من سفر، لين تكتشف انك مادخلت الغرفة قبل ساعة ونص من الوقت المفروض لخروجك منها!
هذا كله غير الاهمال وسوء الخدمة والتنظيف الأي كلام، اذا كان النظام حدد الاسعار لهالشقق، فهو محتاج بعد يحدد لهم وشلون يكونوا شي مفيد في السياحة الداخلية، ياجماعة الخير.. ترا في ناس يجون من برا ويسكنون في هالاماكن.. ع الاقل حنا عارفين البير وغطاها، لكن هذولي وش ذنبهم.. يوم يجون وياخذون صورة مو قد كذا عن ديرتنا.. السالفة يبي لها مداهمة.. لأن الوضع يفشل!