كيبل بحري أجل!

ما يبطلون حركاتهم موظفين هاتف شركات الاتصال، الظاهر والله اعلم أنهم ماخذين دورة «كيف تكون جاهز بتصريفة لأي شي» وعلى فكرة تراني ما اقصد اللي احتجوا لأن هذولي اصلا ما هم فاضيين لنا ويدورون أحد يقنعهم لأنهم ملوا من تلقي التصاريف!
المهم ما لكم بالطويلة، البلاك بيري كذا ماله من الشيطان طاري، حلف ستين يمين ما عاد يشتغل، طبعا اتكلم ع الخدمة مو ب الجهاز، اتصلت على الشركة الا والاخ الكريم متشقق من الفرح والوناسة ويقول لي ازهلها تراه السالفة ما صارت لك انت وحدك.. هذي مشكلة عامة طال عمرك سببها عطل في كيبل بحري بين السعودية وفرنسا!.. والله يا هو ذهين بعد وشلون عرف يحدد الموقع.. عاد انا سمعت الكلام من هنا وشفت كل هالتفاصيل وقلت يا ولد مايبي لها.. دام الخراب عام خلنا أجل نعين خير وان كان على هالكيبل فالله اعلم ان جماعة الناتو طاح منهم كم صاروخ بالغلط في البحر.. تصير ياخوك.. خل نصبر وربك يفرجها!
يوم، يومين.. قررت اطلع البطارية وارجعها، رجعت الخدمة سلام سلام.. متأكد لو اتصلت عليهم وقلت ماني معلمهم باللي صار بشوف وش يقولون، بتجي التصريفة ماشية مليون.. ايه اخوي الخدمة ما راح ترجع لك لين تنحل سالفة اليابان.. الله العالم فيه اشعاعات جت من هناك بالغلط وخربت أم شبكتك انت بالذات!