كائنات تمتيرية

بعض شبابنا الطيبين الله يجزاهم خير، يعتقدون ان أي مناسبة تقام في البلد هي فرصة للوناسة وسعة الصدر، تشوفهم في كل مكان موجودين لكن مالهم دخل باللي جالس يصير، وماغير بس يطالعون بهذا وذلك، ويضحكون على فلان وعلان، ويتنافسون بينهم.. من اللي يسوي حركات استهبال اكثر، ومن اللي يطقطق على روس اكبر عدد من ضيوف المناسبة أو المشاركين!
غير انهم يسوون زحمة ويشغلون مساحة فيه ناس اكثر احتياج لها، وغير انهم يضيعون وقتهم ووقت غيرهم على تمتير رايح جاي وازعاج لخليقة الله، وسوالف ماتدري وش يبون منها، هذولي الناس آخر همهم يعرفون ان هالمؤتمر أو المعرض يمثل المملكة قدام العالم، وان هذولي «اللي يطقطقون عليهم» بيرجعون بعد كم يوم عشان يقولون لربعهم عن التعامل اللي حصلوه «خير - شر» وأكيد ماراح يفسرونه الا بانه تصرف يمثل ثقافة المجتمع.
هذا مايلغي اكيد ان فيه ناس فاهمة وترفع راسك يوم تشوفها تتعامل برقي وتتكلم بأدب، والاهم انهم جايين لأن عندهم هدف محدد، سواء كان تجاري أو دراسي أو مهني أو أي شي، والواحد فيهم يطلع بفائدة حقيقية.. اجل بالله في احد يروح لضيف اجنبي ماله دخل بالرياضة مثلا بس عشان يقول له «منتخبكم ماش يالحبيب!».