طب في مطب

قبل ما نبدا سالفة اليوم احب اقولكم ان خوينا ياسر الشمراني عنده برنامج بهالاسم في الراديو بس عشان لايقول زارف الاسم، وثانيا.. احب اطلب من ادارة المرور الموقرة انها تخصص قسم جديد وتسميه الادارة العامة لتقييم حوادث المطبات والحفر، لأني بصراحة ماني فاهم وين اروح بعد ما اكلت لي مطب محترم ولطيف، وصار الموتر يطلع صوت وقلت ياولد شكلها صامولة طايحة منا والا منا، ويوم اوصل الصناعية يسألني «متى صار الحادث هذا؟»
اكيد ياعمي بيقول كذا.. لأن نص الاشياء اللي ورا وتحت صدامك راحت فيها، ولاهوب حاط يده في السيارة لين تجيب له ورقة اصلاح.. يعني يبي لك ترجع بسرعة وتاخذ رقم لوحة المطب طالما هو خصمك اللي متسبب ف الموضوع بنسبة 100 %، وبعدين نتفاهم!
هذا طبعا غير حوادث الحفر، خصوصا الناس اللي تمر من عند مشاريع وامدادات من نوع «نعتذر على الازعاج» وما يمديك تمشي في المنطقة كم متر الا وانت مسنتر في حفرة على كيف كيفك ما قبلها لوحة ولا بعدها مخرج، وتعال شوف التلفيات اللي بتلحقك، يعني لو انك تتابع برنامج الحصن اتوقع كان قدرت تتخطى هالمواقف!
اهم شي لاتضحكني وتقول ابي تعويض لان محد حولك، وهذا الفرق بين طبتك وطبة الضيوف في برنامج ياسر، انت طبتك مافيها شي واحد يضحك!