عاير القصمان

* مالك لوى يا فهد المطوع.. تبي الحربي يقول ناديكم مهنا ملحه والاّ يعتذر.. هووه يابو بندر.. خبري بك رجل سنع وذرب وشلون تقول إن الحربي لم يوفق مع الرائد وأنت حزتها مرتكي ببيتك وبساقة النصر، وما تعرف الرائد ولا هم يحزنون.
* يا دافع البلاء.. أجل موسى الشمري معيّي يروح من الرائد.. يا بعد طوايفي.. تحريه يبي هالقريشات والاّ يموت بالحمر.. الظاهر جاوبت بنفسك يابوبندر وقلت لدي يقين أن الأندية لن تقدم عرض أفضل من الرائد.. يعني نفهم أن الأندية ما عبّروه والاّ كان دفعوا له لا يصير تبيه يروح لغيركم ويتزعبل.
* مدري وش محرق رز الرائديين من هرج أحمد الحربي.. هو تكلم من تجربة وقال إن التعاون أزين من الرائد وهذا رأيه.. يعني تبونه يخيط أثمه والاّ يمدحكم.. مير ما أقول الاّ من مبطي يا بوحميد والطاية تخر.
* ترى المشعل ماهج لجدة بعد ذاك وذاك.. وعمرو شاص قضب أرضه وشدوقه ما تتفخت.. والدعجاني ما صرّح وقال أخذوني لحم وأحلتوني عظم.. يا معاليقي يا الحربي الحروة أنك قاعد تسبحن علينا بهالمسيان الضعيف.
* وش كارك يا مهندس.. لا تسحبل رجليك بهالقايلة ترى الشمس تلّطع والدعوى مهيب فزعات والمدير يتميلح.. وأنت رجل اسباطي والشرهه عليك كبيرة.. وخزياه بس!
* العربي ما تمسكلهم جادة.. صوع وروع.. أنت متعنقط بالصندوق وهم دايسين بمطينة.. تكفون لا وصلنا علمون.
* النجمة دردبيس.. مدربهم أدرنقة.. واللي حوله يعقب.. والفريق يتدودل.. وابوعلي حبيب لبيب وآخذٍ له غفوة.. كود هالغفوة ما طوّل.
* السراح نكس جدتي فطيمة.. وجدتي لقالت أفعلت حتى وهي مهذرية.
* يقولون إن التعاون يهارجون لاعب دولي كبير وقطعوا معه نص شوط.. والنص الباقي نوبة ثانية.. يعني لا حجّت البقر على قرونه!
* مواري فريق التقدم الثانية وتخب عليهم.. كودهم ما يكبرون اللّقمة أخاف يغصون.. هماهم عمدو ا المقر ييّزي.
* صدق اللي ما يعرف الصقر يشويه.. والأمل ما عرف طير البصر والصقر شواه على ضو مقصورة.. والعجيب إن الصقر تعلّى بالغرابي!
موعدنا الجمعة القابلة.