زي البعارين الهاملة!

تغيرت طبيعة الناس كثير، ايام زمان كانت نفسيات الناس قوية، كان الواحد قليل الشي اللي يهزه او يخليه يكتم، ايام زمان قليل نسمع فلان مريض نفسي، ماكنا نعرف هالخرابيط، كانت الحياة بسيطة ومافيها ضغوط والناس قنوعة وطيبة حيل، ماكنا نعرف سوالف مرض التوحد، ولاكنا نعرف ازمة منتصف العمر، ولاكنا نعرف اكتئاب مابعد الحمل، ولاكنا نعرف كآبة الشتاء، لو اعد لكم من هنا لين بكره اسماء امراض نفسية ماكنا نعرفها، يقولون ان العولمة وضغوط الحياة هي اللي عبثت بنفسيات الناس وخلتها ضعيفة وهشة واي شي يخلي الواحد ماله نفس بشي وفيه غلقه وكتمه مايعرف وش سببها، مع ان الطب النفسي عندنا داج ومن جنب القده الا ان اكثر ناس قالبينها تجارة ولهط قروش هم الاطباء النفسيين، ايام زمان كان الرجال وش مايصير من ظروف ومصايب عليه تلاقيه جبل مايهزه ريح، اللي يعيش هالايام هذي وكان عايش ايام زمان (ياعيني على التعبير) راح يعرف الفرق وش كبره، صارت نفسيه الواحد ترقل لدرجة مايصدقها الشخص، عشان كذا انتشرت عندنا تصديق الخرافات والخزعبلات، ياكثر اللي يحسون ان صايبتهم عين، وياكثر اللي يهابدون ومقتنعين انهم مسحورين، صحيح ان فيه عين وسحر بس مو لهالدرجة المنتشرة عندنا الحين، السحر ماهو بهالسهولة، لكن ضعف نفسياتنا خلانا متدروشين زي البعارين الهاملة!