الرشيدي: رايحين مسرحية «بابا سامحني».. وأتمنى نشوف القصبي

شاهد عيان من الشارع العام، على مسرحيات العيد ونجومها.. له وجهة نظره تجاه ما تابع من الأعمال وله رأيه الخاص بالطبع..
من العايدين والفايزين كل عام وأنتم بخير.
كل عام وأنت بصحة وسلامة.
شكلك بتحضر الليلة المسرحيات؟
إن شاء الله.. ناوي أروح أنا والشباب.
أي المسرحيات ودك تحضرها؟
والله كنا مقررين أننا نحضر مسرحية «بابا سامحني» للفنان خالد سامي.
ليش بالذات هذي المسرحية؟
أحس أنها بتصير فيها ذبّات وخالد سامي فنان كوميدي محبوب وأحس أن المسرح لعبته بعدين اسم المسرحية يدل على أن فيها ضحك على الشباب اللي ما يراعون قيم المجتمع.
طيب ثاني يوم وين بتروحون؟
ثاني يوم يمكن نروح «مستشفى المعاقيل» أو «جابوه الرجاجيل».
ليش بالذات هذي المسرحيتين؟
في الأولى الفنانين كلهم شباب تقدر تقول من سن أكثر المتابعين وفيها فنانين أحبهم، أما في الثانية الفنان بشير الغنيم أحسه جيد على المسرح، وسمعت أن مسرحيتهم فيها حش في بعض القطاعات اللي ما تهتم بالمواطنين.
من الفنان اللي تتمنى تشوفه على المسرح؟
ياخي ودي أشوف ناصر القصبي يمثل على المسرح، وأتمنى من أمانة مدينة الرياض تطلب منه التواجد في المسرح العام المقبل.
حضرت الأعوام الماضية في المسرح؟
إيه حضرت أذكر مسرحية فايز المالكي اللي عرضوها بمركز الملك فهد الثقافي.
وش انطباعك عنها؟
ياخ أحس أن المسرح بصفة عامة اجتهادات وفيه بعض المسرحيات تحس أن مسرح المتوسطة أزين منها.
ليش؟
الواحد إذا حضر المسرح يبغى يضحك وينبسط وفيه مسرحيات الواحد ما يقدر يكملها لا فيها لا ضحك ولا قصة ولا مضمون، وتحس أنها تجيب للواحد «غلقه».
طيب أنت مع أنه يدخلون ممثلات في المسرح وإلا لا؟
أنت تبغى تحرجني بالسؤال ذا «يضحك».. أنا مع كل شي يخدم المسرح، بس أعتقد أهم من المسرح أن المرأة تتواجد في قطاعات تنموية ثانية، والمسرح يصير بعدين آخر شي.
وش رأيك في خطوة المسرح النسائي؟
خطوة جيدة، بس أتمنى من الممثلات أنهم ما تكون أدوارهن كلها تدور حول العيال والشغالة لازم يطرقون مواضيع أهم، لأني بحسب ما فهمت أن المسرح النسائي أغلب مواضيعه سطحية.
مثل إيش؟
مثل بسطة حريم ودلالة وهلم جرا.. مفروض أنهن يكن أكثر عمقا وجرأة.