الحدائي: على القنوات احترام «العوايل»

شاهد عيان من الشارع العام، على الأعمال الرمضانية ونجومها.. له وجهة نظره تجاه ماتابع من الأعمال وله رأيه الخاص بالطبع..
أكيد أنك تتابع التلفزيون هالأيام بكثرة؟
صحيح ويا كثر الأعمال «تارسة» القنوات الفضائية، وفيها الغث والسمين.
يعني منت مركز على عمل واحد؟
لا والله ماني عارف أركز زين بس فيه أشياء أصبحت من الأولويات في المتابعة.
مثل أيش؟
عندك مثلا «طاش» و«سكتم بكتم» وبعض الأعمال التاريخية.
يعني شفت حلقات «طاش» اللي راحت كلها؟
أكيد وشوفها مرتين العرض الأول والإعادة.
وش أكثر حلقة شدتك؟
كثير حلقات منها اللي طرحت قضية الاختلاط.
إنت تشوف أن أعمالنا السعودية غير «طاش» تستحق المتابعة.
تبي الصراحة إيه عندك «سكتم بكتم» نجح بقوة.
ليش؟
لأن بعضها يبغى له شغل.
بس الأعمال السعودية مطلوبة من القنوات الفضائية؟
مطلوبة لأن المشاهد السعودي مربح.
أهاااا يعني مو لقوتها وطرحها؟
القوة والطرح جزء من عوامل كثيرة، ولكن ما ننكر أن بعض أعمالنا كانت ناجحة.
من اللي يشدك من الممثلين في الكوميديا ولا التراجيديا؟
في الكوميديا القصبي وفايز المالكي، أما التراجيديا فهم كثير.
مسلسل تمنيت أنه يكون له جزء ثان؟
بصراحة ما فيه أو أقول لك هم راح يسوون بغض النظر عن الأماني.
وش الأسباب؟
يوفرون على أنفسهم البحث عن أفكار جديدة.
طيب مسلسل تشوف إنه من الأفضل عدم مشاهدته؟
هوامير الصحراء.
ممكن نعرف الأسباب؟
مسلسل كله بشوت وسيارات ما فيه أي شيء جديد.
تراهم صارفين عليه كثير..!
أنا علي من العمل، إن شالله ماصرفوا عليه إلا ريال واحد.
الناس يقارنون المسلسلات السعودية بالخليجية وش رايك؟
أنا أشوف أن الأعمال السعودية تفوقت على بكائيات الدراما الخليجية.
كيف؟
أعمالنا ينقصها شوية تكتيك فني وتصير أحلى شي.
يقولون برامج المسابقات تغري وش رايك فيها؟
برنامج دقت ساعتك وبس.. حبيت العمل وميزة مسابقاتنا إنها ما تخدش الذوق العام مثل غيرها.
تقصد مين؟
بعض القنوات من المفروض أنها تحترم العوايل اللي يتابعونها.
وش أكثر برنامج تتابعه؟
كثير ومو حافظ أسماءها.
و«حروف وألوف» كيفك معاه؟
لو يتركون العرضة أبرك لهم.