عبدالله: المالكي ينام على «كوم ضحك»

شاهد عيان من الشارع العام، على الأعمال الرمضانية ونجومها.. له وجهة نظره تجاه ما تابع من الأعمال، وله رأيه الخاص بالطبع..
بعد الفطور تشوف المسلسلات اللي تعرض في القنوات؟
إيه أكيد.
وش اللي تشوفه؟
«طاش ماطاش» و«بيني وبينك» و«سكتم بكتم»، إضافة إلى «القعقاع بن عمرو»
وغيرهم؟
أتابع «هوامير الصحراء» على قناة روتانا خليجية، وبعد أشوف «شيخ العرب همام» و«ليلة عيد».
وش أكثر شي أعجبك؟
«سكتم بكتم».
ليش؟
أحس أن فايز المالكي رجع بقوة وفيه كمية كوميديا وضحك، باختصار رهيب العمل.
وش اللي خلاك تحكم عليه؟
لأني ما كنت أتوقع أن فايز يقدر يربط بين شخصيتين في العمل لكنه قدر وبقوة إنه ينجح.
طيب أعمالنا السعودية وشرايك فيها؟
بعضها حلو، وفيه نسبة كبيرة منها تحس أنها مكررة.
وش الأعمال العادية من وجهة نظرك؟
تابعت «بيني وبينك» أحس أن المسلسل فيه شي غلط، بس والله مو داري وين.
يعني ما تتابع الأعمال السورية؟
لا، في السنوات الأخيرة ما أحرص عليها.
ليش؟
لأنها تحس أنها نفس القصة كلها أبطال وبطولات.
من الفنان السعودي المميز عندك؟
ناصر القصبي ويوسف الجراح.
كل الفنانين الموجودين مو عاجبينك؟
إلا جميعهم فيهم الخير والبركة.
لو كنت منتجا من بتختار من الممثلين؟
بأختار عبدالله السدحان وناصر القصبي وطارق العلي وعبدالعزيز جاسم.
ليش ما يكونون الأبطال من السعودية؟
أحب التنويع والتركيز على فنانين من جنسيات أخرى.
من يعجبك من الممثلين الخليجيين؟
عبدالعزيز جاسم، سعاد عبدالله وحياة الفهد ومسلسلي «ليلة عيد» و«زوارة خميس».
وش فيهم ممثلينا؟
قلت لك فيهم الخير والبركة ويجي منهم كلهم.
بالنسبة إلى الأعمال المصرية وش اللي تابعت؟
صدقني ما عندي وقت لمتابعة الأعمال، لأن شهر رمضان في الأساس للعبادة، وأنا إنسان مشغول كثير.
مشغول بإيش؟
في عملي وعندي ارتباطات كثيرة، والدراما أشوفها على حسب الوقت والفراغ اللي أكون فيه.
شكلك من محبي البرامج؟
أتابع برنامج الشيخ سلمان العودة وبرنامج للشيخ المغامسي.