البليهي: برامج المسابقات والكوميديا «لطش في لطش»

شاهد عيان من الشارع العام، على الأعمال الرمضانية ونجومها.. له وجهة نظره تجاه ماتابع من الأعمال وله رأيه الخاص بالطبع..
يسعد مساك؟
مساك أسعد هلا والله.
غريبة قاعد برا وما تشوف طاش وهو يعرض الحين؟
أشوفه في الإعادة أحسن.
شكلك مو متحمس مع المسلسلات؟
لا بالعكس أتابع بس مو في هالوقت.
متى تتابع؟
أتابع الأعمال اللي تعرض من بعد 12.00 في الليل والعصر بس؟
طيب وش المسلسلات اللي تحرص على متابعتها؟
في المقام الأول الأعمال الدرامية التراجيدية أميل لها أكثر وبعدها تجي الكوميديا.
ليش تحب التراجيديا أكثر؟
تستهويني أكثر وتشدني، خصوصا إذا كانت القصة مؤثرة.
وش المسلسلات اللي تشوفها؟
أشوف مسلسل حياة الفهد «ليلة عيد» وأشوف مسلسل «شيخ العرب همام» ليحيى الفخراني.
والمسلسلات الكوميدية وش تشوف؟
طبعا أكيد طاش وأمر على سكتم بكتم.
كيف انطباعك عن هالأعمال؟
يعني فيه حلقات حلوة وفكرتها جيدة، وأحيانا تكون حلقة مدري وش تبي.. مثل إيش الحلقات؟
بصراحة حلقة بطرس في طاش أحسها عادية ما فيها فكرة واضحة.
أنت مع الطرح الجريء؟
جريء وشلون.
مثل مناقشة قضية حساسة في المجتمع؟
شوف هي على حسب تناولها وكيفية طرحها ومعالجتها، أما الطرح بس عشان الإثارة فهذا مرفوض.
باين عليك تنتقي اللي تتابعه زين؟
أول شي أشوف كم حلقة إذا ما ناسبني التوجه العام للمسلسل أو الحلقة ما أحرص على المتابعة.
بشكل عام كيف تشوف المسلسلات السعودية والخليجية؟
الكويت مثلا سابقينا بمراحل في التراجيديا، أما في الكوميديا فكلهم حول بعض تكرار وتقليد وسرقة.
وشلون سرقة؟
كل واحد يسرق فكرة الثاني.
طيب كيفك مع البرامج الدينية أو المسابقات؟
الدينية كلها تقريبا تصب في مصلحة وهي تثقيف الناس ونصحهم وإرشادهم، أما المسابقات فما عندك أحد ينطبق عليهم نفس اللي ينطبق على الكوميديا لطش في لطش.