تخيل أن عندك زوجة مثل هذي!

من جانا هالإنترنت ما جانا الخير.. حنا للحين ما افتكينا من إدمان عيالنا للحبوب والكولونيا.. يطلع لينا إدمان الإنترنت.. وإذا تبي تعرف تأثير الإنترنت على الشباب السعودي.. خذ لك لفة على أي شارع.. تشوف شبابنا مدلبحين ظهورهم من كثر الجلوس على الكيبورد.. وأنا، الحمد لله، طمني الدكتور يقول: ما عليك أنت ما أنت مدمن دامك ما تدخل غرف ال(بال توك)!
في الإنترنت فيه موقع عالمي للمزايدات والإعلانات يدخله ملايين الأشخاص اللي يشترون ويبيعون بملايين الدولارات في اليوم الواحد.. ولعلمكم إن فيه مستثمر سعودي من ملاك هالموقع الغريب العجيب.. وأنا في هالموقع لا أبيع ولا أشتري؛ لأن الوالد موصيني أني ما أبيع ولا أشتري إلا نقدي.. حتى الشيك ما يحبه.. يقول يمكن يضحكون عليك الرياجيل.. ما غير تشوفني أقلب فيه وأتفرج على الناس.. أجمل شي لفت نظري بها الموقع أنهم في ركن منه يحطون لك أغرب الإعلانات واللي بعضها والله فوق الخيال.. يعني ممكن تلاقي واحد معلن أنه مستعد يسوي أي شيء تطلبه منه.. مثلا ينط من فوق جبل.. يطمر في نهر.. وواحد معلن أنه ممكن يجي يدرّب عيالك على جميع أصوات الحيوانات، عاد هم ناقصين، لكن أغرب شي لفت نظري أن فيه حرمة، حرمت عليها عيشتها، معلنة عن زوجها وقايلة يا ناس ترى أنا فلانة بنت فلان أقدم لكم جسم زوجي تستخدمونه في وضع أي إعلان تبونه على جسمه وين ما يروح يظل شايله مقابل كذا دولار.. وطبعا من زود دلاخة الزوج راضي بالموضوع، وبالعكس متصور وحاطط صورته عشان الزباين يشوفون وش غلظ زنوده ويطمعون بمساحة الإعلان.. مالت عليك وعلى الدفش زوجك.. تخيل ان عندك زوجة مثل هذي.. قوية راس وعوبا.. ممكن تحولك من سي السيد الى شطاف مواعين!