شركة الشراشف المبلولة !

فيه مواطنين ما يعرفون ينامون الظهر بدون مكيف، ما كانوا يوم انهم صغار يتلحطون بالشمس ويلعبون كورة بعز القوايل لين تغدي رجولهم كنها ركب بعارين، المواطنين اللي ما جربوا قوايل ولاتعودوا ينامون بمكان غير غرفهم والمكيف مكبوس على خششهم وهم يشاخرون، اللي زي كذا يا حبة عيني راحوا فيها هالكم يوم اللي راحوا وهالكم يوم الجايين، مع الحر اللي فوق المعقول وانقطاع الكهرباء اللي ما يحلا لها تنقطع الا بعز الظهر، طبعا انت كمواطن محرور ومشموس ومكهرب ما لك الا ان تطلب ربك يفرجها، لأنك لا سمعت سوالف شركة الكهرب يا تنحر او تنشمس او تتكهرب، اخر سالفة او تبرير او مدري شلون قايل يقولون ان زيادة درجة حرارة وحدة ترفع الاحمال مدري كم عندهم ، يعني يبون يحطون اللوم على درجة الحرارة اللي ترتفع والا هم ما عندهم أي مشكلة، يعني يا مواطنين انشغلوا بتفسير هالعذر لين تنسون همومكم وهموم بزارينكم اللي يذاكرون في الليل على ضو شمعة، اصلا عذر زيادة درجة الحرارة هذا يزيد حرتنا ، ويكهرب مخنا، يعني شركة الكهرب ما تدري قبل سنة انه في اليوم الفلاني بعد كم سنة راح تكون درجة الحرارة كذا ؟ يعني لو فيه أي موظف دخل أي موقع انترنت راح يعرف درجة الحرارة وساعتها راح يعرف وشلون يتصرف، معقول شركة كبيرة زي شركتنا ما عندها حل تعرف فيه درجات الحرارة الى بعد كم سنة ؟!