يا ناس ياهووه حرام عليكم ده اللي بتسووه في المجتمع كل يوم والتاني اشاعات في اشاعات ايش حتسفيدوا من دي الاشاعات اللي بتنشروها في البلد وفي المجتمع خافوا الله واتقوا الله في نفسكم وفي بلدكم وفي مجتمعكم كل ماجات رسالة واتساب تافهه او هابطه او جات اشاعه على جوالاتكم رسلتوها على قروباتكم وعلى اهاليكم وحبايبكم.. ياناس ياهوه هدا الشي ما يرضي الله ولا رسوله ارجوكم ارسلوا الشي اللي فيه خير لكم في دينكم ودنياكم.. اما الهبالات والتفاهات والسخافات مالها داعي انها تترسل وصدقوني كل واحد فينا معلق بعرقوبه وكل واحد فينا حيحاسبه الله جل جلاله على تصرفاته وصدق الله العظيم اذ يقول في كتابه الكريم (إن الله لا يخفى عليه شيء في الأرض ولا في السماء) وكل مين بعقله يعيش .. وخلونا دحين نشوف ايش بيقول مقالنا حق اليوم.. دحين انت ياسيدي كل ما تروح المركاز حقك ده اللي في كيلو2 ترجع حالتك حاله وريحتك كده معفنه كأنك خارج من مسلخ ؟ والله يا بنت الحلال الحاله دي والريحة دي مو انا لوحدي اللي بيشتكي منها هادي الروائح الكريهه بيشتكي منها كل السكان واصحاب المعارض والدكاكين الموجودين في كيلو 2، بالله عليكي في احد عاقل عنده بصر وبصيره يترك مسلخ وسط الحي بيندبح فيه كل انواع الاغنام والابقار والجمال وبعد الدبح شوفي عاد كمية المويات المعفنه والقاذورات والروائح الكريهه اللي بتخرج من ده المسلخ ومن براميل القمايم الموجوده جنبو واللي بيرموا فيها كل القاذورات اللي بتخرج من هادي الدبايح، هدا المسلخ اللي اسمه مسلخ السبيل الاهلي المفروض يكون مكانه بره العمران مو وسط البلد الرايح والجي يتبخر منه كتير من السكان بيشتكوا وبيتكلموا من وجود هدا المسلخ وسط حيهم العتيق واللي بيعرفه اغلب سكان جده لكن محد معبرهم واعطوهم طناش هدا غير الفوضى والازعاج والحراج اللي بيصير في ده الحي من المحرجين سواء كانوا من المقيمين النظاميين او من العماله المتخلفة واللي يبيعوا ويشتروا في الاثاث المستعمل والله عالم هما اشتروه والا سربعووه واللي بيسببه يتقفل الشارع وتزيد الفوضى والزحمه فيه بسبب وجود سياراتهم اللي بتشيل وتحط كل انواع الاثاث يعني الشارع بالعربي كده صار فوضى ما بعدها فوضى عشان كده نتمنى من المسؤولين في الامانه انهم يشوفوا حل لهادي الفوضى واللي بتصير في سوق كيلو 2 وتحاول قد ما تقدر انها تنقل ده المسلخ اللي بيقولوا عليه انه اهلي وهوه في الاصل لا اهلي ولا يحزنون هدا المسلخ جاب العفن والقرف للشارع وللحي وللعالم اللي ساكنه فيه، وعيشوا كتيييييير تشوفوا كتييييييير.
