دحين انت جايب معاك دا القفص وحاطط فيه دجاجتين وديكين ليه ؟ وفين حتوديهم ؟ وفين حتحطهم ؟ وعشان ايه جايبهم، حيبهدلوا البيت ياسيدي؟. وكمان جايب معاك كيس حب وكيس ذرة .. يابنت الحلال ابعدي عن طريقي دحين خليني أحط القفص في البلكونة وبعدين أفهمك الهرجة من طقطق لسلام عليكم .. ياستي هدا القفص اللي فيه الدجاجتين والديكين جبتوا عشان نبغى ناكل دجاج وبيض بلدي على الأقل ناكل حاجة صحية مو زي هادول تجار الدجاج اللي هلكونا ومرضونا من كتر الهرمونات اللي بيصقعوها للدجاج، وغير كدا نفتك من هادول التجار اللي الطمع والجشع عمى قلوبهم وبصايرهم، عالم ما تخاف الله في عباد الله ولا يشبعوا من وسخ الدنيا أرصدتهم وملايينهم في كل بنوك العالم لو اتوزعت زكاة أموالهم بما يرضي الله ما حيكون عندنا فقير في البلد ، على بالهم حياخدوا ملايينهم في كفنهم ، ماعلينا خليهم يجمعوا في ملايينهم وفي رب كريم حيحاسبهم.. زمان يا أم فتو قبل 20 سنة ما كان في البلد إلا شركة وحدة بتبيع وتوزع الدجاج والبيض وكانت دكاكين كتيرة منتشرة بتذبح وتسلخ الدجاج في دكاكينها وكانت الدجاجة المذبوحة سعرها 7 ريال والمسلوخة 8 ريال والله يرحمك ياعم عبده كان أول ما يشوفني يقول لي هلا (بولد بن علي الحلواني) سلخ والا ذبح، أرد عليه أقول له سلخ يا عم عبده. وفي الزمن دا اللي كترت فيه شركات إنتاج الدجاج وكترت السوبر ماركتات اللي بتبيع الدجاج وكتروا هادول التجار الجدد اللي بيبيعوا الدجاج، هدا غير المستوردين اللي بيجيبوا الدجاج من فرنسا والبرازيل، ركبوا الحبايب الموجة زي بقية التجار ورفعوا أسعار الدجاج كدا من غير احم ولا دستور وعذرهم انه الأعلاف وفول الصويا والشعير ارتفع سعرهم وهادي كلها حجج وأعذار واهية والا بإمكانهم كتجار للدواجن يخففوا من تصدير الدجاج لبعض الدول المجاورة لانه أهل البيت أولى وبإمكانهم كمان يشوفوا بدايل لها .. والله يرحم أيام زمان كان تجار الدواجن بيأكلوا الدجاج حاجة يسموها (الطخ) والطخ هدا عبارة عن بقايا السمسم بعد ما ينعصر عشان كدا أتمنى من تجار الدواجن انهم يرجعوا لأيام زمان ويرجعوا للطخ وللكناسة ، واللي ما يعرف الكناسة أقول له هادي عبارة عن بعض الحبوب زي الذرة والقمح والحنطة والدخن بتتشعتر عند محلات بياعين الحبوب وبتتكنس وتنحط في أكياس وبتنباع للناس اللي يحبوا يربوا الدجاج والحمام في مزارعهم .. وياسلام على طعم الدجاج والبيض البلدي. وعيشوا كتيييير تشوفوا كتيييير.
