فضاء الشعر

يا مطوع أصعاب القصيد
• إهداء لأخي صاحب السمو الملكي الأمير خالد الفيصل
يا رايد العلم يا مطوع أصعاب القصيد
يا قايد الغر والعسرات برسانها
جتك القوافي تبختر في لباس جديد
وركبت معك فالسفينة وأنت ربانها
رفعت قدر القوافي بالبديع الفريد
وحلقت بالشعر فوق السحب وأمزانها
يا فارس الشعر شعرك للمولع رصيد
والخيل تعرف قبل تنقاد فرسانها
ما للشعر غير أبو بندر أمير وعميد
ما هي سوالف قليل العرف بأوزانها
يا خوي ويش أنت شايف يوم رايك سديد
الدوحة اللي إتظلل يبست أغصانها
كشر ابوجهي زماني مثل ذيب الجليد
وقت إيضيق على العربان بأوطانها
وأنا الجريح العليل وعلتي بالوريد
عليّ غبر الليالي تشحذ أسنانها
ياما قنصت الجوازي فالبراري وحيد
وياما قضبت العسيف الغفل بعنانها
وياما قطعنا الفيافي فالزمان الشديد
ويا نطحنا هوا الشرقي ودخانها
واليوم فالرجل عن ذب المبادي حديد
وقسرت أخطاها وأنا قصّرت من شأنها
فالنفس حاجات بس الوقت أشوافه عنيد
يضغط على الروح حتى تنثر أشجانها
في تالي العمر صار اللي قريب بعيد
ما غير أصارع أهموم النفس وأحزانها