الوفاء الصحي 2-2

بالبلدي الفصيح

اليوم يا حبايب نبغى نكمل الجزء التاني من المقال وعشان لا نكون متحاملين كتير على الصحة ونوجه كل التهم عليها والباقين يتفرجوا.. اقصد القطاع الخاص اللي بنشوفهم يتصدروا الصحف كل يوم وهم يعلنوا عن ارباحهم الخيالية اللي كسبوها من الخلق وأهل البلد، وكل اللي نشوفه منهم بس الرعايات للمناسبات والاحتفالات اللي ما لها داعي.. يعني لو كل شركة تخصص من أرباحها السنوية ميزانية لدعم ومساندة المشاريع التطويرية زي بناء المراكز الصحية وبناء المدارس وسفلتة الشوارع ما راح تكلف حاجة مع المليارات اللي بيربحوها.. زينا زي دول العالم اللي بتفرض على كل الشركات أنها تبني المدراس والمستشفيات اللي بتساعد في تطوير هادي الخدمات من منطلق الإنسانية والعمل التطوعي لبلدانهم، وفوق هدا بيفرضوا عليهم انهم يدفعوا الضرائب.. واحنا هنا لا ضرايب ولا يحزنون وكأنه شركاتنا في سبات عميق عن هدا الوطن، وهمهم الوحيد حصد المليارات وبس. وعشان ما يكون كلامي هدا معمم على الجميع ما ننسى الدور الكبير اللي سوته شركة الاتصالات السعودية من خلال مساهماتها في خدمة المجتمع ومساندة الجهود اللي بتقدمها الدولة للقطاع الصحي ضمن شراكتها الاستراتيجية مع وزارة الصحة تحت مسمى برنامج ( الوفاء الصحي) وتبرعها ب 100 مليون ريال لبناء وتجهيز الكتير من المراكز الصحية اللي بتقوم بخدمة الآلاف من المواطنين والمقيمين في كل أنحاء المملكة، واللي أعلنها رئيس الشركة المهندس سعود الدويش في واحدة من المناسبات. وبصراحة، أحب أقول لبعض الأصوات الخفية اللي يتهموا شركاتنا الوطنية بالتجاهل فينكم عن شركة الاتصالات السعودية اللي دشنت مركز الهلالية في منطقة القصيم واللي يعتبر أول المراكز الصحية اللي تم تعميرو من قبل القطاع الخاص، وراح يكون نقطة البداية لافتتاح مراكز تانية واللي بدأت في تنفيذها الشركة في عدد من المناطق.. وفينكم عن الشركات التانية اللي شغلها الشاغل تنظيف الجيوب نهاية كل شهر ولا نشوف لهم أي دور في خدمة المجتمع.. عشان كده بقول شكرا لمشتركي الاتصالات السعودية وأسأل الله سبحانه وتعالى أن يجعلها في موازين حسناتهم، وشكرا بحجم الأرض لرئيس مجموعة الاتصالات السعودية المهندس سعود الدويش والقائمين عليها على برنامج الوفاء الصحي. وعيشوا كتيير تشوفوا كتيير.
abofatoo@hotmail.com
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة