حلو كتيير يا ديوان المراقبة

بالبلدي الفصيح

الخبر اللي كان منشور في «عكاظ» قبل اسبوعين واللي بيقول أن ديوان المراقبة العامة بدأ التأسيس لخطوة جديدة تمكنه من إجراء جرد شهري على حسابات الوزارات والمؤسسات الحكومية، كان خبر يفرح وبالمره حلو وهدا هوه الشغل والا بلاش لازم من الجرد الشهري لكل حسابات الوزارات والمؤسسات الحكومية عشان نحمي المال العام من أصحاب النفوس الضعيفة وبصراحة خطوة حلوة يشكر عليها ديوان المراقبة العامة والأحلى من كده إنه ديوان المراقبة العامه حيلزم كل القطاعات الحكوية بإرسال التقارير شهريا بواسطة الأقراص الإلكترونية وهدا اللي سووه أحسن بكتيير من حكاية المراقبة السنوية والربع السنوية. ويكفي اللي حصل في الشهرين الماضية من تجاوزات في بعض من المؤسسات اللي كل الأوادم عرفوها .. لازم ديوان المراقبة العامة يعرف فين بتنصرف المليارات اللي بتعتمدها الدولة لكل الوزارات ولازم كل وزارة تجيب كشف شهري بكل المصروفات اللي صرفتها وترفق مع الكشف كل الفواتير والعقود عشان ديوان المراقبة يعرف فين راحت هادي المليارات وفين انصرفت وبكده يكون الشغل سليم ومية ومية ... والشي التاني لازم تكون المصاريف في المشاريع اللي لها أولوية واللي بتخدم البلد وأهل البلد مو أسوي مشروع سفلتة شارع رئيسي وهوه أساسا مسفلت وحلو وأصرف عليه مئات الأولوف وأترك حي كامل السفلتة حقتو معدومة وحالتها بالبلا لازم المشروع يكون له قيمة للبلد ويستفيد منه أهل البلد وما نصرف الأولوف إلا في مكانها ولازم يكون في مبالغ محددة للمشروع مو نتركها كده عايمة لازم يكون في عقود وشروط ومحاسبة لكل قرش بينصرف وأهم شي ما نسلم كامل المبلغ لمنفذ المشروع لأنه المتعارف عليه إنه نعطية دفعة دفعة ونراقب شغلوو ونطلب منه بيان وتقارير بالمشاريع اللي نفذها واللي انتهى منها ونشوفها مطابقة لكل التصاميم والمواصفات والا لا ويكفينا من اللي حصل في مشاريع جدة من التجاوزات ما الله بها عليم ولازم كمان نحاسب هادول المقاولين المتأخرين في تنفيذ المشاريع ونحاسبهم على كل صغيرة وكبيرة وإذا حضرة الباشا المقاول خبص في المشروع وما نفذوا حسب الرسومات والتصاميم نحملوا مصاريف كل الأضرار اللي جات منه لانه الدولة بتدفع المليارات لهادي المشاريع ويا ريت يكون في تشهير بالاسم والصورة لهادول المقاولين اللي بيخبصوا ويجيبوا العيد في مشاريعهم اللي ما بينفذوها حسب المواصفات والتصاميم المطلوبة منهم، وفي الختام أشكر كل الحبايب والمسؤولين في ديوان المراقبة العامة على الخطوة الجريئة اللي قدموها للبلد وأهل البلد .. والمرة دي ما حيكون في عيشوا كتيير تشوفوا كتيير لانه ديوان المراقبة العامة حط يده على الجرح اللي كنا محتاجينه من زمان ونشوفكم الأسبوع الجاي ونحنا وانتو بخير وصحة وسلامة.
abofatoo@hotmail.com
فاكس: 6764070
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة