STC وخدمة المجتمع

بالبلدي الفصيح

شي طيب وجميل هدا اللي بنشوفه ونسمع ونقرأ عنه انه كتير من الشركات الخاصة والمصانع الوطنية والبنوك بتقوم بتقديم خدمات طيبة وجليلة في خدمة المجتمع وفي جميع المجالات اللي يحتاجها ابن البلد سواء كانت رعاية صحية أو في رعاية بعض المهرجانات اللي بتقوم بيها بعض المؤسسات الخيرية وتقوم برعايتها هادي الشركات أو المصانع أو البنوك واللي بتقدم الدعم سواء كان دعم مادي أو دعم معنوي كتقديم الجوائز للمتفوقين في كل المجالات. ومن هادي الشركات شركة الاتصالات السعودية لأنه بصراحة ما يمر يوم إلا وتسمع انه شركة الاتصالات قامت برعاية بعض من المهرجانات أو الاحتفالات لأنها اعتمدت لهادي المهرجانات والاحتفالات ميزانية كبيرة عشان تقوم بواجبها للبلد ولأهل البلد، وبصراحة شركة الاتصالات شركة رائدة في خدمة المجتمع وفي مجالات كتيرة وكل يوم بنشوف أخبارها في الجرايد لأنها أخدت على عاتقها انها تقوم بهادي الأعمال ورعايتها من واقع ضميرها وإنسانيتها وبقناعة تامة من كل المسؤولين اللي فيها واللي يهمهم انه تكون شركة الاتصالات من الشركات الرائدة في خدمة المجتمع، وإذا جينا نعدد الرعاية والخدمات الكبيرة والجليلة اللي قدمتها شركة الاتصالات في خدمة المجتمع حنلاقيها كتييرة ومنها رعايتها للمصابين بمرض الزهايمر واللي قامت شركة الاتصالات بتعريف أسبابه وكيفية التعامل مع المصابين منه غير كده انها كانت حريصة على تقديم الدعم والمساندة للمصابين خاصة كبار السن. غير كده انه شركة الاتصالات أول شركة وطنية قدمت الدعم الشامل للجمعيات الخيرية في المملكة زي جمعية الأطفال المعوقين ومركز الأمير سلمان لأبحاث الإعاقة وجمعية الأمير فهد بن سلمان الخيرية لرعاية مرضى الفشل الكلوي هدا غير انها بتقدم التبرعات للجهات الخيرية بواسطة الرسائل القصيرة واللي دخلها بالكامل بيروح لهادي الجمعيات الخيرية اللي بتقوم بخدمات إنسانية للمحتاجين. هدا غير رعايتها ودعمها لتكريم 400 متفوق من الأيتام وأبناء أسر الجمعية زي ما حصل في الحفل اللي نظمته جمعية جود النسائية الخيرية في المنطقة الشرقية، هدا غير مشاركتها للنازحين من أهلنا وإخواننا اللي في الحدود لما خففت عنهم من مصيبتهم بعد ما تركوا بيوتهم نتيجة لعملية التطهير اللي قامت بيها القوات المسلحة عشان تحميهم من المتسللين والعابثين بأمن وطننا الغالي، هدا غير انها كانت الشركة الوطنبة الأولى والوحيدة الموجودة بشكل مميز في مركز الإيواء بمحافظة أحد المسارحة، هدا غير دعمها ورعايتها للجمعية الخيرية لرعاية الأيتام ( إنسان ) بواسطة الرسائل النصية واللي أتاحت لكل المشتركين المشاركة والتبرع لهادي الفئة الغالية على قلوبنا لأنه هدا المشروع الخيري فيه نوع من التكافل الاجتماعي والتعاون على البر والتقوى خاصة انه هدا المشروع فيه رعاية رائعة وطيبة لهادول الأيتام لأنه الرسول الكريم بيقول في الحديت الشريف أنا وكافل اليتيم في الجنة، هدا غير مشاركتها الطيبة في مكافحة التدخين، وانتو عارفين ايش اللي يجي من التدخين من الأمراض والمصايب واللي بيموت بسببه الملايين من البشر.
عشان كده بتمنى من كل الشركات الخاصة والمصانع الوطنية والبنوك انها تقوم بخدمات جليلة يستفيد منها المجتمع وأهله لأن الهرجة بتقول اللي مافيه خير لأهله مافيه خير لنفسه، والمرة دي في نهاية مقالي ما حيكون في: عيشوا كتيييير تشوفوا كتييييير. حيكون في: شكرا لعملاء شركة الاتصالات السعودية، وشكرا جزيلا لكل المسؤولين والموظفين في شركة الاتصالات، وإلى الأمام دائما.
abofatoo@hotmail.com
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة