بقايا قلب

أنثر بقايا قلب ما بين حرفين
ألمني بيتين لو بعثروني
مرت ثمان شهور ياوقتي الشين
والجرح يكبر والحبايب نسوني
ماكنت ابكتب وأفتح لجرحي يدين
لكن جروحي بالقصيد نزفوني
ياما دمحت من الخطايا للأدنين
ياما مع القاصين تمطر عيوني
وهناك تصرخ آه لا لوّح البين
وأدفن بقايا الآه لا يلمحوني
كنت أزرع قلوب الحبايب بساتين
وآخايل مزون الفرح لا لفوني
ماروّحو في يوم يشكون باكين
ولا اتذكر مر وقتٍ بكوني
أقفت بي الأحزان قاومتها لين
كل انكسارات الحياه جبروني
كنت أتمنى يجبر الروح غالين
سير عليهم عيدهم وافقدوني
ولا يمر الصاحب اللي من سنين
اللي تمنيته على الوقت عوني
ياجرح يالأحزان يادمعة العين
ياكل قلبٍ عاد عيده بدوني
أنا تعبت من القساوه وأنا لين
أنا بنيت إلى متى تهدموني؟!
الكبر لله والبلا كلنا طين
وأنا بعانق غيبتي سامحوني
يكفيني أنظم لي قصيده وبيتين
وأنسى جروح اللي نسو واتركوني
استودع الله ذكرياتي وهالحين
الله معاكم بالجفا واعذروني