هواجيس الفكر

هاضت هواجيس الفكر والصّدر باح
وطرالي اكتب للنشاما نصيحه
مثايل ٍ مثل العطر والعطر فاح
نظمتها لأهل الوجيه الفليحه
حذراك من رجل ٍ على السدّ فضّاح
اللي ليا قفّيت سدّك يبيحه
واحذر من اللي ما تبع درب الاصلاح
كسّابة المتردّيه والنطيحه
بعض العرب يرّث على قلبك اجراح
الله يبعد عن ديارك نزيحه
حتّيش لو جالك وحتّيش لو راح
ماهوب ينفع فالليال الشحيحه
اقولها صادق ولاني بمزّاح
لا عاد قرب أهل الوجيه الكليحه
احرص على اللي لشوفه النّفس ترتاح
اللي يداوي كلّ نفس ٍ جريحه
واحرص على اللي دايم الدّوم نصّاح
اللي دروبه كلّبوها صريحه
واحرص على اللي جلسته خير وارباح
راع العلوم الطيّبه والمليحه
واحرص على اللي يسعدك وقت الاتراح
ويعجبك لاضاقت عليك الفسيحه
شهم ٍ كريم ٍ للمواجيب نطّاح
حرٍّ عزيز ٍ ما مشى بالفضيحه
شيخ ٍ سنافي كاسب ٍ كل الامداح
ريف ٍ لربعه والرجال الطريحه
لا ثارت الهيجا معَ شلف ورماح
ينحر حريبه مثل نحر الذبيحه
سعد الرفيق وللعدو سمٍّ اذحاح
امجنّب ٍ كل الوصوف القبيحه
هذا الذي يبقى لنا درع ووشاح
والا الرّدي يا ليت يبنى ضريحه
ودرب المعزه يعرفه ربع ٍ اصحاح
اللي تروم المرجله والمديحه
والمرجله يبغى لها صبر وكْفاح
شدّ الحزام وخلّ نفسك لحيحه
والزم كتاب الله على طول يا صاح
ترى بريق الشر يجذب لميحه
واحفظ حقوق الجار .. خلّك له سلاح
قاله رسول الله بحكمه فصيحه
والصمت حكمه والصبر خير مفتاح
والعدل ميزان العقول الرجيحه
هذي مثايل صغتها وسط الالواح
نظمتها لأهل القلوب الصِّحيحه
والختم صلوا عدّ ما بارق ٍ لاح
على النبي واعداد فيض القريحه