قدوتي في الطيب

البيوت الندر الصمخ الفريده
لا قريناها تزيل الهم عنا
لا كتبها مبدع هندس قصيده
قلنا هذا الشعر والآ لا تعنى
شاعر الابداع للمعنى يجيده
يبني الجزله وغيره ما شحنا
والقصيد الجزل نقراه ونعيده
يطرب الجمهور لا شله وغنا
والمعاني انواع واشكالٍ عديده
والقوافي تنطلق والآ تثنى
في غزل والا مدح رجلٍ وليده
او وصف والا هجا منهو امتحنا
وقافي اللي ملبسه حله جديده
باتخير مدح زبان المجنا
بامدحه والمدح ينشر في الجريده
وباشهره بين العرب منا ومنا
ذاك ابوي اللي عسى الجنه رصيده
مدرسه في المرجله من كل فنا
مبارك العسكر عسى روحه شهيده
ومع رسول الحق يشرب ويتهنا
عون ربعه في المواقيف الشديده
كاسبٍ الطيب من غزوة مهنا
لا نطق رايه من الارياء السديده
والشحم في مجلسه دايم مثنا
اسمه لحاله يمثل له بديده
والعرب تثني من الشام ليمنا
قدوتي في الطيب ودروب العقيده
وياعساني في طريقه ماتونا
اشهد ان موته علي اكبر فقيده
والقدر يخلف هل الهقوات ظنا
قلتها والله يفعل ما يريده
والامن الله يديمه في وطنا