مكاشفة أبو العريف مع المبرقعة..!!

ابو العريف ايش اخبارك؟
* بخير وعال العال, وكل شيء عشرة على عشرة.
@ ليش؟
* اندية الشرقية ومسؤولوها في حب ووئام وعزايم وسحورات وندوات بس اللي خبرك فيهم مو معاهم وهذا اللي مزين الجلسات واللقاءات لان تواجد اللي خبرك فيهم قلب المودة الى شجار ويمكن يوصل لرفع شكاوي ومحاكم وردور وخطابات... الخ!
@ يعني رياضة الشرقية بدونهم احسن؟
* الجميع يشعر انه في امان وبين اخوانه وبين محبيه, مو اذا حضروا بعض الناس الجميع يتذكر المشاكل والدعاوى... الخ.
@ ما علينا البلوي سواها وضرب ضربته؟
* حتى الاتفاق ضرب ضربته مليونين وسبعمائة وخمسين الفا سهلة لا وفوق البيعة علي المطرود ولاعب اجنبي والله حصلها الاتفاق وما كانت على البال ولاعلى الخاطر.
@ ابو العريف: هذا الاسبوع ماتقدر تتكلم عن الخليج
ليه ماخلص حبر القلم.
@ لكن الامور عسى سارت على ما يرام؟
* اسألوا سلمان المطرود لكن الدنيا كانت (تحت الصفر) يوم الصلح..!!
@ يعني عكس الناس, مثل هالمواقف خبري احمرار الوجوه وتصبب العرق.. ولكن الامور في الخليج غير.
@ مثل جدة غير؟
* لا الدنيا في جدة مكهربة بعد ان سقط الاهلي في يد الخليج امام جمهوره.
@ لكن الحكام ساندوا الخليج؟
* يالمبرقعة المباراة جابوها في التليفزيون والجميع كشف الاسطوانة وكل شيء بان عالمكشوف.
@ يعني الحكام ساندوا الخليج؟
* طبعا حتى ان مناف آل سعيد ما يستاهل استبعاد دقيقتين عندما اعتدى على المنيان في دخول خاطىء كل اللي يستاهله حسب قانون كرة اليد استبعاده نهائي من المباراة بالبطاقة الحمراء وعدم نزول أي شخص آخر حتى نهاية المباراة.
@ اكيد الحكم طرده وكتب فيه تقرير؟
* سلامتك كل اللي سواه الحكم استبعاد دقيقتين وما سلم من الاهلاوية, يعني لو طبق الحكم القانون ايش يصير في الدنيا.
@ الحكام يقولون في تقريرهم ان هناك حالة اعتداء عليهم وشتم ايضا, اكيد اتحاد اليد ما يخاف من احد ويطبق القانون؟
* الاهلاوية اذكياء عرفوا لها هددوا بشطب اللعبة عبر الصحف للضغط على اتحاد اليد حتى لا يأخذ أي قرار بايقاف اللاعبين المتسببين في الاحداث واعتقد ان تقرير الحكام مكانه الحفظ بدون اجتماع حتى للجنة الفنية وعفا الله عما سلف.
يعني هالضجة اللي قام فيها الاهلاوية (اخرطي)؟
* اسألوا مدير منتخب اليد طلال هاشم فقد قال الحقيقة كاملة للصحف واسألوا عبدالرحمن عايد الذي وبخ لاعبي الاهلي في غرفة الملابس على فعلتهم ولا تسألوا اتحاد اليد لانه لن يتخذ اية عقوبة, ولكن لو كان الاعتداء من لاعبي الخليج لصدر القرار في اليوم التالي للمباراة, حتى لا يتهم المطرود بمحاباة الخليج.