حوار خاص وحصري عبر صحيفة التميز الإلكترونية : مع شاعر الإتحاد فؤاد ينبعاوي

شاعر إرتبط إسمه بأعرق الأندية السعودية وعميدها وبأشهر أغنية تهتز معها المدرجات الإتحادية وهي ون ون والإتي نمبر ون شاعر الإتحاد فؤاد ينبعاوي ضيفنا لهذه الليلة يحكي لنا عن رمضان في الماضي والحاضر والذكريات الرمضانية في في جدة حكى لنا وأعاد لنا ماضي جدة العريق وكيف كانت الحياة في جدة القديمة نترككم مع الحوار الجميل مع شاعر الإتحاد فؤاد ينبعاوي :
البطاقة الشخصية ؟
فؤاد ينبعاوي المعروف بشاعر الإتحاد شاعر شعبي شاعر الحلمنتيشي شاعر غنائي ..
كم كان عمرك عندما بدأت الصوم ؟
بدأت الصوم وعمري 7 سنوات ولكن صوم من وراء الزير كما كانوا يسمونه أي نص ونص ..أما الصوم الفعلي كان في سن التاسعة وكان الجو ملتهب وحار جدا وكنا صغار نلعب ونتعب ونشرب شوية مويه من الزير ثلاجة زمان حقتنا تبل الريق وتخفف الحرارة الشديدة شقاوة أطفال .
أحكي لنا عن أول يوم لك في الصيام ؟
أول يوم صمته حقيقي تعبت فيه كثير بس كان صوم صوم مو كده وكده لكنه كان يوم طويل بالمرة وماصدقت على الله يضرب المدفع شربت المويه كلها من شدة العطش.
كيف تستعد لإستقبال الشهر الكريم ؟
كنا نستقبل رمضان إستقبال كبير وبفرحة غامرة فيها من البراْة والطفولة ..وكنا نقوم بإشعال الطراطيع ونجوم الليل والأهازيج الجميلة والموشحات الشعبية والمواويل ولرمضان كانت عندنا أكلات خاصة مثل قمر الدين والسمبوسة والكنافة واللقيمات والفول المبخر بالمستكه .
ماهو برنامجك اليومي في رمضأن ؟
كان برنامجنا اليومي في رمضأن ياسيدي نبدأ رمضان بالسعادة والفرحة لأنه شهر روحاني وجميل وإيماني نستشعر فيه بعفوية وبحلاوة الصيام وكنا نقضي أول النهار في النوم وبعد صلاة الظهر في تلاوة القرآن إلى العصرية وبعد العصر نروح نجيب المقاضي الخفيفة اليومية اللي نشتريها كل يوم بيومه عشان تكون طازة ولذيذة زي الفول وعيش الشريك والفتوت والفول بالسمن البلدي وياسلام كده سعاده ورضا ولله الحمد وكان على سفرة الإفطار الوان من أكلات الجيران والناس الطيبين .
ماهي وجبتك المفضلة على مائدة الإفطار الرمضانية ؟
وجبتي المفضلة شوربة حب اللي يحبها قلبك والسمبوسة اللي تستاهل عليها أمنا من يدها الحنونة مية بوسه والفول المحبوك وكاستين سوبيا تروق البال وتريح الأعصاب وبعدها وحدة تعسيلة تروق الراس .
مالفرق بين رمضان في الماضي والآن ؟
الفرق بين رمضان الماضي والآن بصراحة الفرق كبير جدا إيش جاب لجاب رمضان زمان كانت له نكهة خاصة وكلما مرت علينا السنين حنينا للأيام الحلوة القديمة وكيف كانوا أهل أول وكيف كنا عايشين نتذكر ريحة الحبايب والناس الحلوه الطيبه كيف كانوا طعمين وكيف كان طعم وحلاوة رمضان معاهم رمضان بمعناه الحقيقي صيام يعني صيام مو طول النهار نايمين من الصبح لأذان المغرب والسهر لأخر الليل على الكلام الفاضي والمليان وفي الأسواق لأخر الليل الله يرحم أيام زمان تلاوة القرآن وقيام وذكر وإحسان والناس تتفقد أحوال الأيتام والأرامل والمساكين واللي عنده يعطي اللي ماعنده ويسألوا عن أحوال الجيران وعايشين على المحبة والتعاون والمودة وبالذات حواري البلد القديمة والرويس والكندره وباب مكة والصحيفة والعمارية والبغدادية ..اللي يرسل شوربه والسمبوسة والتطلي وماسيه ومهلبيه وكنا ولا أحلا من كده ..ناس طيبين قلوبهم عامره بالخير وبالمحبة وشويه يؤذن العشاء ونروح نصلي التراويح ويالله على شهر الرحمن والغفران وشهر البركة والإحسان وبعد التراويح نلعب في الحاره لعبة إسمها الطيري ونلعب الطره وتنزل البسطات والأكلات الشعبية ويتجمعوا الأهل والقرايب وكل الحبايب والجيران وسمر وحكاوي وضحكه ودكه برحه ونفوس شرحه وجمعه سمحه ويجمعنا الأنس والحب والعشره الطيبه ..حتى وقت السحور يمر على كل حاره المسحراتي بالطبله وهو ينادي ياصائم قوم وحد الدائم ويمروا على بيوتات الحاره بيت بيت وياخذوا اللي فيه النصيب وصلي على الحبيب جرح قلبك يطيب ونتسحر بالسمك وحوت أبو قرن وشوي في الفرن مع سلطة الحمر ونحلي بالكنافه والقطايف .
موقف طريف حصل لك في رمضان ؟
في مره من المرات كنت عازم أصحابي على الإفطار وكان من ضمنهم واحد إسمه صدقه جوا كلهم إلا صدقه تأخر الله يهديه وجاء على أذان المغرب ودق الجرس وكلمنا على الأنترفون وكان الصوت يقطع وكان الخط الثاني موصول بالمطبخ والمدام تجهز الفطور وهي ردت تقول مين قال صدقه فأفتكرت المدام إن هذا مسكين واقف على الباب يطلب صدقه قالت له على الله يابويه الله يعطيك ورد عليها بإنفعال وزعل أنا صدقه صاحب أبو ياسر وهي تسمع نص الكلام والنص الثاني ماتسمعه وتقول زوجتي روح يابويه دحين وتعال بعد المغرب ونزلت لقيت صاحبي صدقه زعلان متضايق يبغى يرجع لبيته وأخذته بالأحضان وطبطبت عليه وحكيت له إن الجهاز عطلان وبعدها غير إسمه من صدقه لإحسان .
هل سبق لك الصيام خارج السعوديه ؟
نعم سبق لي الصيام خارج السعوديه ولكن الصيام في أرض الحرمين والله ياناس له طعم ثاني وله رمضانية خاصه وروح حلوه في جمعة الأهل والأحبه وأحلى صحبه .
شخص تحرص على دعوته للإفطار معك ؟
أول يوم في رمضان وكل سنة أكون حريص على الذهاب لمسقط رأسي ينبع البهيه للإفطار مع الوالده الحبيبه الله يطول في عمرها ويمتعها بالصحة والعافية ومع أخواني واهلي وعزوتي الله لايحرمني منهم ولايحرمهم مني وثاني إفطار مع زوجتي أم ياسرالله يحفظها وأبنائي ياسر وطارق الله يبارك لي فيهم وإبنتي الوحيده كريمه وزوجها وأحفادي الغالين ريان والبراء ثم أصحابي وأحبابي وبشكتي وعزائم الكثير من الإتحاديين .
كلمة المحبينك ؟
أقولهم ياجماعة الخير نحن بنستنى رمضان سنة كاملة مشتاقين له وللأسف نضيعه في الكلام الفاضي ومانستغله في الطاعات وقراْءة القرآن وختمه والصدقة والإحسان والقيام ورضا الرحمن آمين يارب العالمين لي ولأخواني المسلمين .
كلمة لصحيفة التميز ؟
إنت صحيفة متميزة إسم على مسمى بتغطية جميع الأحداث والأخبار أول بأول فإلى الأمام ودائما في المقدمة كما أشكر أخواني الصحفيين ورئيسة التحرير على الإهتمام الملموس بشاعر الإتحاد فؤاد ينبعاوي وأقدم لهم شكري وتقديري لإستضافتي في رمضان وكذلك رعايتهم لأمسيتي الشعرية المميزة وأتمنى أكون عند حسن الظن ونجما متألقا وبرعاية صحيفة التميز .. ودمتم فخرا للصحافة الحرة والسباقة دائما وأبدا بين الأخرين .
باقة ورد لمن تهديها ؟
باقة ورد أهديها لأخي وصديقي وحبيبي سعيد الجدعاني أبو غيداء وأكتب على باقة الورد ( الناس معادن ومن أغلى المعادن ناس ) وإنت عزيز وغالي علي كثير .. شكرا لكل الأحبة ولكل من ساندني .. مع تحيات شأعر الإتحاد فؤاد ينبعاوي .