ازكى التهاني والتباريك بالعيد

ازكى التهاني والتباريك بالعيد
نزفها بخلاص لبو الجميعي
لحامي حمى الإسلام نسل الاماجيد
آل سعود اهل المقام الرفيعي
ومعها تحيات من القلب وتزيد
بعنبر وكاد وريح مسك طبيعي
ألذ من در امهات المفاريد
اللي رعن ازهار نبت الربيعي
تهدي لبو فيصل اجموع وتفاريد
معايدة شعب محب امطيعي
انت الذي مافيك شكه وتعقيد
وحلمك على شعبك وصدرك وسيعي
وفيك الكرم وهبة ولاهوب تقليد
كفك نداء وكفوف غيرك ضريعي
وجودك يعم اكهول ويتام ابعيد
ويعم طفل في امهاده رضيعي
وعندي على ذلك دليل وشواهيد
الصحف تكتب والاذاعة تذيعي
الله يمهلك سنين تماديد
ويبقيك يا حصن البلاد المنيعي
يابن الزعيم امخلد المجد تخليد
عسى له الهادي محمد شفيعي
عبدالعزيز امحدد الملك تحديد
بمهره ورمح وحد سيف ذريعي
هومات عنتر والزناتي وبوزيد
ما عادلنه فوق بنت الطليعي
خمسين عام وزود وبجهاد وجهيد
والسيف في يمناه يلمع لميعي
يقطع على عوص النظا نازح البيد
ويسري وياطا فوق شوك النقيعي
مرخى سموعه للضعوف الرعاديد
يسوقه الدافع وعزم بتيعي
وعن الجزيرة كسر الطوق والقيد
وقبله عصت غيره وعيت تطيعي
بيوم من اهواله تشيب المواليد
وتشبع به الضبعه وذيب امجيعي
فقر وجهل واطماع وحروب اتبيد
ولا فيه امان الا ذراع الشجيعي
واليوم فيها كل يوم لنا عيد
وهذاه من فضل البصير السميعي
ثم فضل حكام البلاد الصناديد
لعلهم دايم بعز رفيعي
ولكم علينا حق دعوة وتمجيد
وطاعة ولاء ومعاهد ما يضيعي
ولو فيه عضو يدخله ريب ويحيد
يبتر ويرمي بالمحل الشنيعي
حنا العرب ولنا سلوم وتقاليد
وكل فدا عمرك لعمره يبيعي
نواف بن عبدالعزيز بن رازن