عواكيس

* الاستاذ معوكس معقولة انعدام التمثيل السعودي في مونديال 2014.. بعد خروج المنتخب شاهدنا غياب خليل جلال وطاقمه.. الله يستر وش يصير في كأس العالم 2018؟
راشد الدوسري - الخبر
- والمشكله أبو خليل على طول ودع مثل اللي يقل لعبوني والا أبخرب!
* فاكهة الاعلام ابو العواكيس.. يقولون انك تعد برامج على طريقة (سكتم بكتم) وانك تجيب الضيف وتعطيه يتكلم على كيفه واذا شفت ما وراه سنع قمت تهدده بضيف ثاني يهاجمه ويكشف خفاياه.. صحيح هذا الشيء؟
محمد العبيد - الرياض
- والله ياذا الحوارات الفضائية بعضها كنها المسلسلة اليومية حافظين الادوار صم وأهم شي الملفات اللي فوق عليه كلام والباقي ورق تصوير A4!
* صاحب القلم المثير واللسان السليط.. وش رايك نعقد شراكة معك لتصنيع اثواب بالوان الاندية ونبيعها على بعض الصحفيين.. اتوقع رايح نربح مية بالمية؟
سعود السعيد - خميس مشيط
- على طاري الثياب اللي عليها شعار الاندية يقولون واحد جابوه في برنامج الظهيرة ونسى ثوبه في الاستديو!
* هل يعقل يا معوكس ان علاقاتك برؤساء الاندية رغم الحش فيهم سمن على عسل.. نقدر نقول انك تموه على الناس؟
يوسف الحربي - المدينة المنورة
- ما يموه الا القطاوة!
* حبيب الرياضيين معوكس من الشخص المؤهل لعلاج حال التحكيم وكثرة اخفاقاته وشطحاته اللي ما لها داعي؟
سعد الشمراني - ابها
- وش تعالج ووش تخلي الشق أكبر من الرقعة لو جبت لها بنشري عالمي!
* حببينا معوكس الظاهر علة الهلال مش فنية ولا لاعبين.. الظاهر ان الوضع الاداري ما يشجع على عودة هلال غيرتس وكوزمين.. بحكم خبرتك عطنا العلاج الزين؟
فهد العبدالله - الباحة
- ما ينفع لا زين ولا ال stc الامور كلها مدبرة وما اطولك يا ليل!
* العزيز معوكس نشوف بعض الناس في البرامج طبق طريقة (قابل الصياح.. بصياح تسلم) ظنك وراه شيء؟
حمود السالم - الرياض
- طبق طريقة المطبق والمعصوب!
* اخي العزيز معوكس ما هي الاستراتيجية المناسبة حتى تعود الكرة السعودية الى وضعها الطبيعي؟
بدر العنزي - تبوك
- العودة للأسس العلمية المدروسة ومواصلة التغريد بالبيجر!
* الناقد الخبير معوكس ها الحين أي مطرود لازم يشوفون له شغلة حتى تمرمطت الرياضة واصبحت في وضع لا تحسد عليه؟
نايف الماجد - جدة
- الفلاشات تسوي أكثر!
* اخينا وحبيبنا معوكس وش اكثر منتخب يخوض معسكرات ويشارك في البطولات والنتيجة واحدة.. الى متى؟
طارق الجعفري - الجوف
- ما غيره الاولمبي اللي جهازه الفني من سنة السبلة!
* صراحة قالها كثير من جماهير الاتحاد.. ما لها الا جمجوم اما غيره فما غير بهرجة وتضليل.. والنتيجة ضياع في ضياع؟
محمد الغامدي - جدة
- ضياع والحقيقه في سنوات الضياع!
* صاحب المليون رساله ابو العواكيس
تحيه طيبة وبعد:
وش قصة إداراة الهلال مع احتياطي حراس الشباب العام ابراهيم زايد، وذا السنة شيعان شكلهم بالدور والسنة الجاية يا ترى من.
أحمد الحمد - بريدة
- اكيد النتيف او حمود سلطان!
* قاهرهم وحابس دمهم أبو العواكيس
تحيه طيبة وبعد:
* تكفى يا الخبير علمني ليه البرنامج الفضائي جاب محلل أجنبي وعنده وطني الكل يثق بخبرته وتحليلاته وش القصة يا بوالعواكيس
نواف الصيخان - حي الفلاح
- القصة تلقاها في معرض الكتاب والمخرج عاوز كذا!
* الاشهر والأملح وخفيف الظل معوكس
بعد التحية والسلام
* من اللاعب اللي إذا طاح تحزن عليه وتقول جعله في الفردوس الأعلى وفجأه يقوم كنه حصان في سباق دبي الدولي
عاشقة الموج الأزرق
- ثلاثه وكلهم في فريق واحد وآخر بلنتي قبل أسبوع خلا بلاتر شوي ولا يستقيل من الفيفا!
كوزمين