حامي بيوت الله

هذا فهد موته يهز الملايين
البدو واللي ساكنين المدينه
هذا فهد قايد جموع المسلمين
حامي بيوت الله ومعز دينه
هذا فهد لاعود العلم علمين
من هامته يقدح بالأرياء السمينه
هذا فهد لا شان طبع المعادين
وبدت لهم بعض العلوم المشينه
اليا ذكروا حامي بيوت الحرمين
خافوا ولو هم في حصون حصينه
يدرون بأفعاله هل الهند والصين
ومن هيبته يقفون له طايعينه
هذا فهد تشهد لفعله فلسطين
ومواقفه يشهد لها مجاهدينه
يوم الكويت ارهوا عليها المعادين
وصارت تحت حكم العراقي رهينه
صاحت وقالت يازبون المخلين
قالت فهد قال اطلبي ما تبينه
قالت رهينة قال حنا مضرين
لرد حق اللي نصانا بحينه
هذا فهد ريف الضعوف المساكين
ياكثر ما أسعد من قلوب حزينه
يعيش من خيره قريبين وأقصين
على الوفاء والطيب عود يدينه
يخفي من الاحسان ضعفين ما يبين
حتى شماله ما علمت عن يمينه
والله لو بالفهد يطلب مفادين
بأعمارنا أنا كلنا فاديينه
لو كان حكم الله وحنا مطيعين
ما قدر الوالي لنا مرتضينه
نرجوا عسى قبره ورود ورياحين
وبرد وطمأنينة وثبات وسكينه
ويارد على حوض الخيار الميامين
في جنة فيها الصفات الحسينه
دعوة ومن صادق لها قولوا آمين
تكفون قولوا آمين يا سامعينه
وعلى كثر ما حنا لفقده حزينين
يبقى عزانا بالرجال الأمينه
نجم يغيب ونجم من بعده يبين
وإلى العلي قادوا شموخ السفينه
بعد الفهد جاها عظيم القوانين
الله على حمل الأمانه يعينه
عبدالله اللي بين العز تبين
نطلب من الوالي يطول سنينه
حكيم راي وباس فارس ميادين
له كلمة راس المعادي اتهينه
ايجنن الاعدا بالأفعال تجنين
وغيث مغيث يبهج مواطنيه
ولي عهده نايبه عزوة الدين
ساس الوفاء سلطان ساعد يمينه
سلطان ابو خالد زبون المخليين
الخير مرسوم بطلة جبينه
اسموه باسم الخير ناس كثيرين
الشاهد الله والبشر شاهدينه
وباقي السعود مرجحين الموازين
وافين في عسر الليالي ولينه
تاريخهم يشهد منول وهالحين
مجد لجيل أجيالهم مورثينه
والشعب حنا للأوامر مطيعين
ما قالت الدولة لنا منفذينه
ما نطيع فيهم هرج بعض المجانين
ضعاف العقول مغيرين الرطينه
معنا عقول ونعرف الزين والشين
والعرف ما يعرض على عارفينه
والخاتمه نحلف برب الثقلين
انا مع الدولة ذراع معينه
نموت بالديره فقارا وحافين
اخير ممن باع داره ودينه