تبكيه دار الشرف والشعب يدعي له

اسوأ خبر بثت الأنباء تفاصيله
لوعة حزن ما يسمى غيرها لوعة
ومن ذاق لوعة فراق الأب يا ويله
والشعب والمملكة تنعى ومفجوعة
تنعى زعيم رفيعاتن مناويله
سمعة بلاده وشعبه منه مرفوعة
تبكيه دار الشرف والشعب يدعي له
يدعى وجدواه يسقي الأرض بدموعه
مليكنا اللي شعوب الارض تلجيله
وقت الكوارث ويمنها من الروعة
ادهى دواهي زمانه ما تباري له
تفهق من الخوف مقموعة وممنوعة
صاحب قرار زها التاريخ تسجيله
افعوله البيض في التاريخ مطبوعة
القدس تنخاه والأقصى ينادي له
وسكان دار بيد شارون مطموعة
ترجيه عنها يزيح الظلم ويشيله
لان الثقة في زعيم العرب موضوعة
تعب وناضل لها وارسل مراسيله
قصده يرجع وطن وحقوق مشروعة
ولكن جاه القدر مافي القد حيله
والاجل له ساعات ماهيب مدفوعة
رحل ومنه استلم شيخ مفاعيله
فيها الشرف والفخر للدار وربوعه
عبدالله اللي بعيداتن مواصيله
تخضع له الكايده وتصير له طوعه
غيث على المملكة ما ينقطه سيله
على الوطن ضافي خيره ومنفوعه
نبايعه بالولاء الصادق ونمضي له
وفي الثقة ثابتة ماهيب منزوعة
ولي عهده عسى الايام تصفي له
محبته في قلوب الشعب مزروعة
ملوكنا اللي تكيل وتوفي الكيله
اهل المكارم حماة الدار ودروعه
رفعت وطنا مصابيحه قناديله
صانوه اهل راية ماهيب مخضوعة