يجبر عزانا به عظيم الجلالي

اعنف خبر سمعت به يوم الاثنين
علم يزلزل شامخات الجبالي
باخر جماد بعام سته وعشرين
جانا خبر موت الزعيم المثالي
موته فجع شعب بحبه وفيين
يجبر عزانا به عظيم الجلالي
في ما كتبه الله بلاشك راضين
كل البشر مردها للزوالي
نحزن ويحزن من فراقه ملايين
ذي دبرة المولى على كل حالي
الناس من موته وفقده حزينين
ولا احد بكى الا لارحل عنه غالي
فهد فهد عز العرب والسلاطين
رجل محنك من زحول الرجالي
قايد حكيم ومن رجال حكيمين
حكم الشريعه طبقه بالعدالي
تشهد لوقفاته جميع الميادين
يشيل حمل جاير ما يشالي
له حجة تفلح ومعها براهين
مواقفة مشهودة اول وتالي
كافح وجاهد في قضية فلسطين
عايش قضيتها بطول الليالي
ولبنان عقب احروب دامت لها اسنين
خلص مشاكلها وفك الجدالي
والا الكويت وازمته عام تسعين
وقف وحررها حميد الخصالي
رجل السلام بساعة العسر واللين
اسم على مسمى لا جاله مجالي
عددت بعض افعال من قوم الدين
ولا احصى فعول اللي فعوله جزالي
نرفع يدينا نطلب الرب داعين
عساه بالفردوس ياخير والي
ندعي وياسامع دعانا قل امين
عسى مقامه عند واليه عالي
وبعده لعبدالله مكانه وتمكين
كل يعده للوطن راس مالي
لك ياملكنا كل شعبك موالين
ولا خسر رجال لمثلك يوالي
وسلطان عضدك كلنا له محبين
لاجل المواطن يرخص أغلى الحلالي
وصلاة ربي عد نبت البساتين
واعداد ما يمطر صدوق الخيالي
على نبي بين الحق تبيين
مرسله رب يتصف بالكمالي