سلام يا الوادي اللي قد نزلك العام مخلوق

شاعر وقصيدة

الشاعر الكبير احمد الناصر الشايع – متعه الله بالصحة والعافية - شاعر تعجز الألسن والاحرف في وصفه كونه - بحد ذاته - مدرسة شعرية كبرى استقى منها العديد من الشعراء البلاغة في الاسلوب والتركيب القوي في مفردات الشعر له اسلوبه المميز في بناء وتركيب القصيدة بحكم مايملكه من خبرة وتجارب في الحياة ممزوجة بمشاعر ذاتية صادقة فهو شاعر فرض وجوده منذ سنين طويلة في مجال شعري النظم والمحاورة ومن يسمع او يقرأ قصائده يجد فيها البصمة والهوية الخاصة به مما أضفى على قصائده الجمال والاسلوب التي يطرب لها المتلقي وتحرك مشاعره
ومن قصائد الشاعر: "احمد الناصر الشايع"
سلام يا الوادي اللي قد نزلك العام مخلوق
مدري من اي النحايا راح من ديره لديره
لكن إلى جيت مدهاله وقفت وصابني عوق
يحتار عنده قدم رجلي وياقف عن مسيره
ماهوب ودي ولكن حب خلي ساقني سوق
أناظر البيت من عقبه واسولف مع قصيره
من كثر ما أقبل معه واقفي معه سويت طاروق
هذي سواة العشير اللي شكا فرقا عشيره
ياشين فرقى الضحى شيناه والمطرود ملحوق
الله يضفي على اللي راح جنحان الستيره
وشلون ابدله وقلبي مع صخيف الروح ماسوق
لا وا هني المعافى ماشتكى شره وخيره
وانا تطارد هواجيسي وحمل الغبن مطبوق
اجحد صوابي عن العالم وانا روحي خطيره
قالوا لي الناس خل المنتحي والحي مرزوق
والناس واجد ولكن ماتريد النفس غيره
هذا وانا خابرٍ راعي الهوى ماهوب ماثوق
والله فلا انسى العشير اللي عليّ يبدي السريره
يقوله اللي يبي خله وله بالدرب خازوق
ماله جدى إلا تكسر عبرته بأقصى ضميره