صوت الصورة

يا شايب الرحمن مبروك مبروك
العلم في تالي زمانك كسبته
كل الذي حولك وشافوك حيوك
وتباركوا في خطك اللي كتبته
العلم نور وضده الجهل متروك
كم جاهلٍ لا شفت حاله رحمته
خالد بن ناصر المخيمر - روضة سدير
العلم مطلوبٍ من المهد للحد
لو كان يا طلابته كان بالصين
وبفصل محو أميّةٍ جالس الجد
وعزيمته محل فخراً وتثمين
ومستعدٍ للمناقش.. وللرد
وكل من مثله على الرأس والعين
سعود عائش الحربي - القاهرة
العلم شامل لكل الناس
ما هوب لحدٍ عن الثاني
الجدّ يكتب على القرطاس
ما هوب بفلوس مجاني
عبدالكريم عبدالرحمن السلوم - القرائن
إلحق بركب العلم.. والعلم مفروض
محو الجهل حملات صيفٍ تنظم
كم واحدٍ بسبابها صار منهوض
فك الحروف اليوم والعلم عظم
تأصل مدارس بالبراري على الروض
والفصل معروفٍ نظامه على نظم
عبدالمحسن بن محمد المحيسن
رياض الخبراء
في مدرسة ليلي نشوف المسنين
جو يطلبون العلم حفظ وكتابه
وهذا الكهل كنه مدرّس حصص دِين
لو كان واقف قلت يشرح خطابه
سعود عبدالعزيز الهزاع - نعام
شوفوا كبير السن يركض ورى العلم
كافح وثابر قلت هذي الرجوله
محلا مجاله وأصبح اليوم كالحلم
هذا زمان العلم ما أطيب حصوله
راحت سنين العمر وأصبحت في هم
وزاح الظلام اللي مضى بالسهوله
محمد عبدالعزيز الخنيفر - أشيقر
العلم من المهد إلى اللحد تعليم
ما حددوه بوقت والا مكاني
العود يرجي له من الرب تكريم
حيثه طلب علمه بجد وتفاني
يالله صغير السن قد شفت تصميم
اللي عن الدنيا مقفي وفاني
عبدالكريم النغيمشي - لوذه
ما فيه يأسٍ لو تعدى الثمانين
ادرس تعلّم خل عنك الكساله
جاهد وخل العلم لك منبرٍ زين
واطلب من الله لا تجيك البطاله
محو الجهل واضح وشفناه بالعين
وعبر الخزامى نبذ أهل الجهاله
حمد عبدالله الوايلي - حوطة سدير
اشهد إن الشايب عزومه قويه
يوم أشوفه جالسٍ يقراء ويكتب
من يلومه ضايع فالمهمهيه
إيتعلم صايرٍ للعلم مكسب
إيتدارك طاردٍ محو الأمية
جل فاله خير كان الخير يطلب
خليف فهيد الحربي - الرياض
تسلم يمينك عم.. يا عم.. يا عم
ياللي تحب العلم لو طالت أسنين
فضّلت درسك ناسي الغم والهم
ما كن حولك ناس في يسار ويمين
بشائر القحطاني - الرياض
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 4871070
ونرحب بما تلتقطه عدساكم من الصور
الهادفة والطريفة .. ويا هلا
صورة العدد السابق