صوت الصورة

ما جاء المطوع والكتاتيب تبغاه
يغيّب عليهم جزء عم وياسين
نالوا صدارة مطلب العلم والجاه
تخرّج القاضي.. خطيب المصلين
سعود عبدالعزيز الهزاع - نعام
الله يا عصرٍ مضى ليته يعود
وترجع معه ذيك السنين السعيده
في الناس فقرٍ لكن الطيب موجود
فيهم صفا نفسٍ.. وصافي عقيده
تعليمهم في سالف الوقت محدود
حدتهم ظروف الزمان الشديده
خمسة عيالٍ فيهم الخير مشهود
صوره قديمه انقلتها الجريده
ناصر بن جمعان آل عوض - وادي الدواسر
حيّ الرجال اللي من المهد للحد
دايم علوم العز يطرد وراها
العلم بحر ولا لقي للبحر حد
واصل مسير البحث وأحصد جزاها
بدر الحزيمي
إن كان ظني ما يخيب
فالصوره هذي شفتها
يوم ان يحفر كم قليب
في ديريتي عرفتها
النفط من أول صعيب
نوات تدرس وقتها
عبدالكريم إبراهيم بن خزيّم - البكيرية
مصاحفٍ خمسه مع الشبان
تلفتوا للي يصوّر سويه
يتلون عن حبٍ لآيات قرآن
قلّة موارد والعزايم قويه
سعود عائش الحربي - القاهرة
صورة ذكرتني بالليالي الجميله
دوك طلابها أول يوم هم يدرسون
همّهم يحفظون الدرس في كل ليله
لا كهارب ولا موتر ولا يحزنون
من تخرّج من السادس يساوي قبيله
يكتب الخط ويدرّس على كل لون
مبارك بن محمد بن طرجم - وادي الدواسر
لك يا زمن منّا سلام وتحيات
ذكرى تعطر كل وقتٍ مضى لك
ويا جيل كم عانيت في ماضيٍ فات
كم ذقت من ويلاتها والمهالك
حمد عبدالله الوايلي - حوطة سدير
هذا نظام الدرس في ماضي الأيام
يوم الدراسه بالمساجد كتاتيب
كم خرّجت من عالم صاروا أعلام
ترى الوسيله وقتها الفطر الشيب
عبدالمحسن بن محمد المحيسن - رياض الخبراء
شوفوا شباب اليوم كانوا يعانون
اسلافكم بالساس درسٍ وتعليم
وأنتم بهذا الوقت حاضر وممنون
ومهما طلبتوا شي بالحال تسليم
مير استغلوا وقتكم يوم وسنون
وأيضا الشهر ويّا الدقايق بتنظيم
عبد الكريم النغيمشي - لوذة
الله وأكبر يا زمانٍ جميل
فيه البراءه والوجيه المسفره
وتعليم قرآنٍ حكيمٍ جليل
وكتابة حروف الهجاء بالمحبره
أحمد سليمان العتيق - الرياض
خمسة من الشبّان في لحظة الدرس
خلّوا الدراسة ينظرون التصاوير
وقتٍ مضى ما تسمع الهمز والهمس
الكل حاضر دون غيب التفاكير
بشائر القحطاني - الرياض
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 4871070
ونرحب بما تلتقطه عدساكم من الصور
الطريفة والهادفة.. ويا هلا
،