أهلا هلا صبو لبو بندر الكيف

مزن تزبر جاء سحابه مراديف
برقه ينوض ويشتعل في مباديه
قنوفه تسابق مع ربابه على الطيف
وبله تهشم من شمال مناشيه
نو وراء نو بروقه كواشيف
سيله تحدر يحتدم من علاويه
ترقب له الحوطة بروس المشاريف
بالعود الأزرق والتحايا نبديه
أهلاً هلا صبو لبو بندر الكيف
البن الأشقر والشحم في صيانيه
خالد ولد بندر زبون المخاويف
أمير نجد الله يحقق مناويه
وحيو سليل الجود شيخ المعاريف
نجل الملك تركي عسى الله يحييه
وحوطة تميم اليوم تزداد تشريف
وتسعد بكم دار للأمجاد تشريه
وحنا لشوفه كل طيب مشاغيف
شرواك يا حر تسلسل مجانيه
في ظل أبو متعب اخوانٍ مواليف
من حكمته شعبه يحبه ويغليه
عساه يسلم من جميع الصواديف
أمين يا سامع مناجاة داعيه
وسلمان حارب كل من كان به زيف
ومقرن عسى المولى يسدد خطاويه
خيالة العوجاء هل الدين والسيف
عيال الزعيم اللي كبار هقاويه
عبدالعزيز اللي على المملكة ريف
رسم حدود أرجاء الوطن مع نواحيه
وصلوا عدد مزنٍ تسوقه عواصيف
على شفيع الخلق والرب هاديه