جزاء الأم

اللي يبي يلحق جزاء الأم غلطان
لو حج فيها واعتمر عشر مرات
وكل العشر رجلي ورمضا وحفيان
وهي على كتوفه طوال المسافات
الأم عانت عانها عون رحمن
الأم تعدَّت حدود المعاناة
الأم منبع المشاعر بالإنسان
الأم خانة فوق كل الحسابات
ما يسدّ فراغاتها كاينٍ كان
لو تجتمع خلق الله أحياء وأموات
وأنا أمِّي اللي كلها احساس واحسان
مضرب مثل للأمهات الحنونات
يحرم عليها النوم لا صرت مرضان
وأنا المريض يجي لي أحيان غفوات
أوحي تسمِّيها علي بعض الاحيان
وتنفيخها علي في بعض الآيات
وأوحي دعاها للولي عالي الشان
زودٍ على دعاها عقب كل صلاة
يا كثر ما شالت وشالت علشان
ما شيل زود هموم ولا زود ضيقات
عز الله إنِّي طشت في ماض الازمان
عز الله إنِّي زدتها زود حسرات
لا جيت نصف الليل ساري وطربان
وفتحت باب البيت بشويش وسكات
لقيتها قبالي وهي كلها احزان
واقفةٍ تجاذب طوال التنهّات
لا شفتها دنقّت خجلٍ وندمان
ولعنت أبو جدّ السهر والطرابات
الله يواجرها على كل ما كان
ويعوضها بجنان عدن الوسيعات