عبدالعزيز الشهيل

بعض الملا ما تفهم أدناه وأقصاه

يا الله ثم يا الله يا الله يا الله
يا كامل باسماه وايضا صفاته
يا من ضمن رزقه لخلقه بحسناه
والعفو عن زلاتهم من سماته
هو الإله ولا لنا غيره إله
نفنى ولا نلحق جزا مكرماته
ومن بعد ذكره طاب شعري ومعناه
والشعر في وقته يعادل حلاته
الشعر له جمهور مخلص ويهواه
ويتابعه دايم ويجمع شتاته
له قيمته في أول الوقت واتلاه
في عقل من يفهم خفا مفرداته
الموجب اني كان أنا قلت ويلاه
معذور لو طول لساني سكاته
لو كل ما يطري على البال قلناه
ان كان ضعنا بين ودّه وهاته
لكن ألمّح والذكي شعري اكفاه
والا الغبي لا ما يفارق عماته
بعض الملا ما تفهم ادناه واقصاه
متساويه حسناه مع سيئاته
مغتر تلعب له عل الكيف دنياه
ومضيعٍ فيها خطاه وقداته
ما يدري ان اللي وطا الغير ياطاه
ومن غدرها لا ما يحصل نجاته
يا شين ضيعة تالي العمر شيناه
اللي بها الرجّال يخسر حياته
يمشي وهو قانع ولكن بعمياه
ما حسّب حساب الخطا والشماته
من لا يحوش الطيب في أول صباه
لا كبر صعبه لو بذل معجزاته
المرجله مثل الهنوف المحنّاه
ولا تعشق إلا اللي فعوله مراته
اللي قليل اللي تسوى سواياه
لا صار زود ونقص تثبت براته
حرٍ فرض نفسه بطيبه وممشاه
ويفخر به القاصين قبل لحماته
الرجل لولا الصّيت وافعال يمناه
وش يفرقه لا قلتها عن خواته