فات العتاب

وبدد الذنب أبجديات الكلام
وبعض الذنوب تجبّ ما ياتي بعدها من عتب
لا مرّت تشيل المواجع مابها برد وسلام
تشعل عذاب الروح والعشره تعرضها المهب
ما عاد تفرق يوم مات الوصل في درب الخصام
ما قلته أدور سبب للبعد لو عندي سبب
ليتي عرفت المنتهى ساعة لقانا قبل عام
ما كان قلبي غرّه المكسب وضيّع ما كسب
شفتك وعلقني هدب عينك قبل ترخي اللثام
ويوم إنك أرخيت اللثام أنسيتني شوف الهدب
جذبت خفاقي وجاذبتك طواريق الغرام
أبغى آتريح في فياض العشق من عقب التعب
يممت شطرك كل أحاسيسي وطاولت الهيام
مهوى فؤاد، وقرة عيون، وحياةٍ تنحسب
كنت الغرام وكانت جروحك على قلبي حرام
قلبٍ يحب بصدق ما يرضى العذاب لمن يحب
تصحى بحضنٍ من وله وبحضن من لهفه تنام
غلاك ما خذته رضا، شلته من أعماقي نهب
ويوم اخدعوك أهل الملام أرخيت سمعك للملام
صدّقت فيني قولة القايل وكذبة من كذب
الشك ضربه فالخوافق مثل ضربات السهام
لا والله إلا فعلته فيها كما السيف الحدب
الشك نارٍ ولّعت في حب تاليته حطام
وأصحابك اللي غيروا سكّتك .. حمالة حطب
في كل مره تعتبر زلّتك .. غلطه والسلام
وأعذرك وإن بيّن فراقك .. قلت ما الله كتب
واليوم قد فات العتاب وتبّت يدين الوئام
لو كان فيه أسباب يبقى الشك هو أكبر سبب!