أكتب معاناتي وأسجل احساسي

قال الذي مانام ليله يهوجس
وإلى نشد يقول مافيّ باسي
ماهوب من طرد الهوى صار يونس
ماعذب المجنون وأبونواسي
لكن تغربل من أمور تعكس
ومن مرها يشرب ويروي بكاسي
يشوف له ناس بها آثار من مس
وعقولها صارت بليا كراسي
دايم على شذب العراقيب تمتس
وتحد للحوم الخلايق أمواسي
تسهر بقال وقيل بالليل الأدمس
وتنثر على دروب الخلايق هراسي
بمجالس تطفح بقول ينجس
وبصدورها وأستغفر الله خساسي
أحد بها يكذب والاخر يملس
ويصدر تقارير بليا قياسي
زيد ردي وعبيد يعصد ويمرس
لو كانهم مثل الجبال الرواسي
غيبة ونمة وبالمجالس تأسس
ومن فوحها واشكي على الله نقاسي
وياليت ياللي بغفلة الناس لك حس
أنك تذكر كان ساهي وناسي
الموت حصاد الخلايق والأنفس
اللي معه خضر النوامي يباسي
وكل على قوله يفصل ويلبس
وباكر يشوف الخير وإلا المآسي
ويا مدوج في غفلة الناس وتعس
ترى الجزاء بالمثل ويوم تداسي
ويالله عسى عن مجلس الطيب تكنس
حيثك خبيث النفس وصابك عطاسي
هذا بسبب ما صار والهم يرجس
وأخفيه في صدري وبين براسي
وأبغى أشرح الواقع وأنا منه محتس
وأكتب معاناتي وأسجل إحساسي
ولا أقول قولي عام وأعيد وأنكس
ولا ناب صراف الذهب بالنحاسي
وبعض المجالس من جديد ودرس
أثمن من الغالي ولو كان ماسي
وأختامها أبدأ وبختم على أس
وعلى النبي صلوا كرام الأساسي
عبدالعزيز بن محمد اليحيان