عواكيس

* عزيزي معوكس مارأيك بكلام محمد نور بأنه سيهزم الهلال؟
صحن قايم العنزي
- ابونوران راحت عليه نسى ان الزمن غدار والعتب على "الفبركة"!
* عزيزي المحترم ابوالعواكيس أبي رأيك في لوائح الانضباط والغرامات الجديدة ومن المستفيد من ذي الملايين والاندية تعاني والكرة السعودية في انحدار؟
محمدالحميد-مرات
-المستفيد سوق الاسهم!
* المغرد معوكس تحياتي كم تتوقع نتيجة الاخضر واستراليا ؟ وبعدين ماكنا بحاجة لحسابات معقدة الله يذكر جيل الثنيان ورفاقه من اول مباراة وحنا واصلين المونديال؟
عبدالله المطيري-خالد النمير حي المصيف الرياض
-والجيل الحالي من اول مباراة واصلين الدائري الشرقي!
* وش رأيك يامعوكس بموضة تأجيل المباريات يعني وش الجديد عند لجنة المسابقات ماغير اجلوا- قدموا؟
حمد العمار- الدمام
-يمكن سووا معها توأمة!
* الاستاذ معوكس يبدو ان المصائب لاتأتي فرادى بالنسبة لنادي الاتحاد من المسؤول؟
خالد الدهمشي - عرعر
-حطوها في رأس كيك وغراب!
* خفيف الظل معوكس صحيح يقولون ان صورتك انتشرت مع احدى بطولات ناديك المفضل وين الحياد والامانة؟
محمد العجمي- نجران
-انت خل بعض الاندية تحقق بطولة وتشوف المحللين والمعدين في صورة جماعية!
* الحبيب ابو العواكيس من برأيك يستحق جائزة الموسم من الحكام اختر بين ثلاثة مطرف وإلا عواجي وإلا الهويش؟
صالح الرشيد - الافلاج
-مافيه احد حولها على حكام السلة!
* هل صحيح يامعوكس انك دائم تجري وراء اللي يحشونك في البرامج والفضائيات وانك تعطيهم بعض الاخبار؟
يوسف الحبيب- الرياض
-على قولتهم أهم شيء مايحشونني ولا فريقي ولاعبيه بالطقاق!
* العزيز معوكس صحيح انك نمت وحلمت انك مسجل هدف في مرمى البرازيل بنهائي كأس العالم وان فريقك فاز على برشلونة وأخذ البطولة؟
نهار الرشيدي- الحناكية
-هذا حلم الضبعة!
* الاستاذ معوكس لايكون انت اللي ترسل رسائل لرئيس لجنة الحكام يقولون الرقم زي رقم جوالك ماهو مميز؟
عبدالله النغيمش - رفحاء
-اصلا جوالي شحن كل يوم عشرة!
* البروفسور ما تشعر ان لجنة الحكام نجحت في تلميع نفسها ونست المهم وهو تطوير التحكيم؟
فارس النفيعي- مكة المكرمة
-شوية تلميع مابقى برنامج ماطلعوا فيه وخذ مدح كنها لجنة "الفيفا"!
* النبيه ابو العواكيس وش رأيك بتدريب الكولمبي هيجيتا لحراس النصر على حركة العقرب يعني ان شاء الله بنشوف مستوى غير؟
النصراوي سعد الحميد
-لا ويقولون باقي حركة الضب الاصفر!
**الحبيب ابو العواكيس ماتشوف ان مغاربة الهلال ماخذينها سياحة توهم جايين واجازة في باريس؟
بندر العصاي-عنيزه
-يمكن القصد باريس نجد عندكم بالمصفر آويلاه ه ه!
* الغالي معوكس والله زمن عقب عيال عطيف والتحدي والبلاي ستيشن كذا يروح نجمنا ابومعاذ أقول ياخسارتك ياحسن
الشبابي-عبودي
- شكل الميزانية ماعاد تحمل إلا قيمة درزن اتاري!
* العزيز على قلبي معوكس وش ذا النصر العالمي تشخيص والسماعات في الأذان كنك تشوف برشلونة نازل من الباص والله ماتفرق مع النظارات الشمسية بعد ولابسينها في الليل؟
عبدالملك المرشد-عرقه
-مافيه فرق إلا طموح المركز الثامن!
**قاهرهم وحابس دمهم معوكس والله وصاروا بعض المذيعين يحلمون بنتائج المنتخب لكن احلام يوم التلفزيون ابيض واسود وش تتوقع ياصديقي احلامي الليلة؟
حمدالدوسري -العزيزية
-احلامك ماتعدى شوفة خويك ابوعبيد يملك ناطحة سحاب وانت تجول ومعك بودي قارد في سوق الحمام!