البخل

البخل ياللي تحسبونه رجاله
ثروه عكس المرجلة يامساكين
خصله ذميمة تحرم الرجل ماله
وتسبب انهم يكرهوه المسلمين
راعيه بعيون الرجاجيل عاله
حتى ولو يكسب ميات الملايين
لابد ما يجلس وحيد(ن) لحاله
لا يقبله صاحب ولا يعشقه زين
منبوذ في ربعه صديقه رياله
ماكن عطاك اياه لو تطلبه دين
يعني على المكشوف درب الحثاله
ولا سلكه الاردي من رديين
ولا الفتي لا طاب جده وخاله
لا صحت له با يقسم الصف صفين
معنى البخل يا للي جعلته؟ نذاله
غلطان من سمى البخيلين عسرين
العسر من بهر لضيفه دلاله
من بعد ما حصل الذبيحة بسكين
اليا دعيت جاد بماله وحاله
ما هو يقول أمنين ولا على وين
انطح به الشامخ يذبه لحاله
ونطح به وجيه العدا والسلاطين
لا مال حملك جاك فازع وشاله
ما هو يمد الك ايد بيمد ليدين
هذا عشيق المرجل والجماله
جعله مع الوافين يتعمر اسنين
ولا الحثالة كاسبين الفساله
حياتهم ما هي تهم القريبين
إن مات واللا حي مالك وماله
والله ما تبكي عليهم ولا عين
طارق بن قهوش الوايلي