حي الصيام.. وحي كثر العباده

هل ارمضان وحي ذكره وطاريه
وحي الصيام.. وحي كثر العباده
يفرح به المسلم ويذعن لواليه
وفي طاعة الوالي يزيد اجتهاده
يسعى ولا خاب العمل في مساعيه
ويبذر ويوم الدين يلقى حصاده
فرض كتبه الله لا يمكن يخليه
ما همته دنيا العنا والنكاده
يقرا كتاب الله ويفهم معانيه
ولا يسرده في طول الأيام عاده
ينقاد لأمر الله ويترك نواهيه
وتبقى حياته كلها له سعاده
يصوم يومه واكثر الليل يحييه
طاعه لمن يعلم سراير عباده
وإلى لقا المحتاج بالحال يعطيه
يسد حاجاته ويبلغ مراده
من حسن ذاته ما تغير مباديه
انا اشهد انه يستحق الاشاده
مظاهره ما تختلف عن خوافيه
وكلن على اخلاقه عطاه الشهاده
لكن بعض الناس دنياه تغريه
وفخ الهوى في شهوة النفس صاده
فرضه يفوت امن الكسل ما يصليه
طول النهار الراس فوق الوساده
وإلى ضواه الليل بانت مواريه
يذنب ويسرح بالملاغى جواده
والمال تمضي مدته ما يزكيه
ما يدري انه لو يزكيه زاده
امسك بصومه عن طعامٍ يغذيه
والله غني عن ترك شربه وزاده
عسى ولي الكون للحق يهديه
ولطاعته دايم يزيد انقياده
من طاب ربه في فعوله يجازيه
ولا خاب عبدٍ بالولي اعتماده
أحمد سعود الحمد