كسر المشاعر

يامترفه يوم القصايد حقايق
هاك الحقيقه لِنهار المواجه
حبك بقلبي طابعً له وثايق
يشبه طلوع الفجر وقت انبلاجه
حبً نمى ماعاقه أيااات عايق
لبْست لك فالعمر درعه وتاجه
حب الشرف والعز واقوى الطرايق
البُعد عوقه والموده علاجه
بس السموحه واسمعيني دقايق
بعض التَشره مالنا فيه حاجه
إن كان شفتي بال مغرمك ضايق
لاتنشدينه وش معكّر مزاجه
يكسر شعوري والمشاعر رقايق
(وكسر المشاعر مثل كسر الزجاجه)
ماينجبر لوكان جبره طبايق
يوم الصَبر مايلتفت لإنفراجه
الضيق بانٍ له بيوت وحدايق
في وسط صدري وين احصّل خراجه
وإن كان شفتي بال شاعرك رايق
اخذي قصيداً مايطّفا اسِراجه
وهاتي سواليفك من اقصى العمايق
دام الزمن يضحك وطلقاً احجاجه
لابد ماينساق للعمر سايق
وبحر المنايا شاربينٍ هماجه