إعداد: عادي الشمري

بيت وصدى

كان بيت الأسبوع الماضي من طرح الشاعر خالد إبراهيم المرشود من الرياض حول مقترح الأخ فهد عبدالرزاق الشمري لموضوع من يؤدون فريضة الحج كل عام ويتجاهلون مضايقة المسلمين ومبدأ إعطاء الفرصة للآخرين..
يا ناس ياللي كل عام تحجون
لا تضايقون الناس والحج مرة
وكان الصدى من الشعراء رائعاً:
المؤمن اللي يدي الفريضه يبا العون
أمن الله المعبود ورضاه سره
يترك مجال شوي للناس يمشون
ونقول له مشكور والله يدره
- الشاعر جسار مهدي السبيعي
حجيت فرضك وامسك ارضك ولا تهون
تلقى من الخيرات وايضا المسره
اجر وثواب ما خفاكم وتدرون
تجنب الاخطار ودروب المضره
- محمد بن عبدالعزيز الخنيفر، أشيقر
الدين يسر في كثير من الشون
والحج حسب الاستطاعات مره
الزحمة أهل الحج منها يضجون
وفوق الزحايم يكسب الشخص مره
- سعود عائش التميمي الحربي، القاهرة
خلوا مجال كيف يا قوم تنسون
والامر واضح مثل شمس المجره
طاعة ولي الأمر واجب ومسنون
ومضايقات الناس شي مضره
- علي الزولاني، فيفا
الحج مرة يا عرب لا تزيدون
خلو امجال الغير ما من مضره
مره تكفي كان للخير تبغون
وعفو من اللي عالم بكل ذره
- نفل محمد الدوسري، الأفلاج
المسلمين اخوان ولبعضهم عون
كم مسلم راحة شقيقه تسره
واطهر بشر ما حج والناس يدرون
الا بحجه ماشي فيها مغره
- شاهر بن شايع الشدادي الحربي، بريدة
يا طالبين الخير بالله تكفون
لا تضايقون اللي نوى الحج مره
الضيق ما يصلح ولا فيه تمشون
نصيحتن مني وكل ومقره
- سالم مبارك الصخابرة
عط فرصة الحجاج لله يلبون
الدين ما يرضى لمسلم مضره
لا تزاحم اللي جو من البعد يمشون
متكبدين أسفار بحر وبره
- سعود بن عبدالعزيز الهزاع، نعام
بيت الأسبوع
كتبه الشاعر سعود عائش الحربي من القاهرة حول موضوع المباني المستأجرة للمدارس وهو مقترح للأخ حمود سعد الضويحي والبيت يقول:
أغلب مدارسنا على عقد وايجار
متى على الله ننتهي من غثاها
نستقبل صدى البيت بثلاثة أبيات فقط تناقش هذه القضية الهامة وذلك على الفاكس 4871070 أو الايميل rb-khozama@alriyadh.com
مقترح لبيت الأسبوع القادم
بعث للصفحة الأخ متعب فريح التريباني مقترحاً لبيت الأسبوع القادم وهو تأخر نزول الأمطار والابتهال لله وطلب الاستغاثة.