صوت الصورة

مجموعة الأشبال تجري طوابير
والكل منهم مجتهد في سباقه
الوضع آمن لا حواجز على السير
والفوز للي جاهزن بالياقه
حاتم نايف الحبردي، الرياض
تراكض الصبيان في سباق الضواحي
والكل منهم طامعن يا صل أول
يالله عساهم سالمينٍ صحاحي
وكسب الجوايز في الخواطر تجول
عبدالله بن إبراهيم العبودي، عشيرة سدير
هذي الرياضة به فوايد عظيمه
جدد نشاطك بين لحظه وساعات
تبني نفوسٍ باذن ربي سليمه
هذا هو المطلوب في بعض الأوقات
محمد بن عبدالعزيز الخنيفر
لياقتك يا الفتى حافظ عليها
باذن الولي تسلم عن جميع الاسقام
الهروله وقايتك وان كان فيها
بعض التعب لا شك ما هوب هدام
نفل الدوسري، الخرج
رقمي ثلاثة عشر محدن بسابقني
صغير والكاس صعبن ما تنولونه
الكاس معشوقتي والكاس عاشقني
وثلثين منهم على باصك تشيلونه
عبدالرحمن عبدالله الشمراني، الرياض
المسافه طويله والعيال استعدو
بالعزيمه وصبر النفس جات المكاسب
المعالي لقومٍ تالي الوقت سادو
والهمم يتجنبها ضعيفٍ وراسب
معيض بن برمان الحبابي
اختراق الضاحيه قد له زمان
ما يشاهد غير في حفلٍ كبير
رياضته تخليك في بر الأمان
عن مرض سكر مع دمك يسير
سعود بن عبدالعزيز الهزاع، نعام
يا خمسة اعش جاك واحد وعشرين
رجلينه الثنتين في الجو حايمه
اطلع شوي يسار والا اطلع يمين
قوايمك عوج وقوايمه قايمه
علي بن ثابت القحطاني
صح الرياضه لكل الناس
ما هيب لحدن عن الثاني
فيها نشاطن.. وفيها احساس
تلقاه في كل ميداني
عبدالكريم عبدالرحمن السلوم، القرائن
ثلاثه وعشرين واحد من هو الأول
الفايز اللي يشيل الكاس بيدينه
واللي تأخر علينا وركضه مطول
محدن مصفق.. ولا ربعه محبينه
عبيد الثواب، حائل
يا حلو ذا صوره.. ويا جود الأطفال
الكل منهم جاب قوة نشاطه
أكيد فيها جايزه ما بها جدال
واللي سبق منهم يزيد انبساطه
فايز فرحان السويلم
فتحت مدارسنا وطلابنا جو
والمملكه للعلم تبذل جهدها
مهندس بالأرض وطيار بالجو
حتى الفتاة اليوم تخدم بلدها
سعد الحماد
هذا اختراق الضاحيه بيتعب الحيل
يحتاج مجهوداً كبيراً وخارق
وطول المسافه أتعب صاعد الجيل
مجهود واحد ما فيه فارق
حمد عبدالله الوايلي
للسباق الكل يشحذ همته
والحظيظ اللي ينول الجايزه
كلٍ في أوايل رميته
وبالرياضه كل الأعضاء فايزه
سعود عائش الحربي، القاهرة
سباق التتابع يا هلي صار له دور
ينمي أجسام أطفالنا بالمدارس
واللي يمارس للرياضه ومشهور
هداف يطلع أو يمكن حارس
خالد بن ناصر المخيمر
صورة العدد