تحفظ لنا سلطان

ياالله يامالك ولك ملك ماكان
ياعالم بالبينه والخفيه
يارافع سبع على كف ميزان
اطلبك ياربي ورافع ايديه
تحفظ لنا سلطان وتعيد سلطان
سالم معافى الجسم من كل سيه
ولي عهد المملكة عالي الشان
قائد سطول الجيش عضيد خيه
سلطان وجه الخير من ماضي الأزمان
غيث على شعبه مزونه رويه
فيه التواضع للمواطن والاحسان
ونواجد تضحك ونفس رضيه
ملجأ الضعيف اللي من الوقت غلبان
ياكثر ما مدت ايديه العطية
كم من يتيم جاه نساه الاحزان
يمسح دموعه باليدين السخية
وكم من مدين جاه من جور ديان
فرج عنه همه حميد السجية
وكم من قضايا حلها حل بإتقان
ما عند أبو خالد تصعب قضية
شعبه معه كنهم له أولاد وأخوان
الشعب عنده كلهم بالسويه
بينه وبين الشعب ما صك بيبان
يستقبل الزوار صبح وعشية
هذا الصحيح وزبدة الهرج نيشان
أقول يا سلطان ما فيه زيه
وصلاة ربي عد همال الأمزان
على رسول الله محمد نبيه