ذهبية النوم

عواكيس

قبل اولمبياد بكين كنت بورطة كبيرة مع أم العيال ، كل ماقررت اشتري بطانيات قالت تكفى لاتجيب الصينية تراها تطير النوم ، وإذا قررت اشتري مكيف قالت مايبرد ماتدري انه صيني !! وإذا تفلسفت واشتريت ستاير تهاوشنا ليش تجيب الصيني وأنت تدري أنها ماتحجب الشمس !!
لا وإلا السراير عاد هذي قصة ثانية ، بنظر أم العيال إن اللي ينام على سرير صيني كنه نايم بصندوق وانيت يتمشى بالثمامة !!..
جننتني وهي ماتدري إني أدور الرخيص.
لكن مااقول إلا الله يوفقك وين مارحت ياعلي الدحيلب أنقذتني من أم العيال وأنقذت محفظتي المنتفه وأنقذت الصين كلها (بنومة الأولمبياد) ..
أجل ياحلاة النوم بالمنتجات الصينية ، من سمعت بنومتك يابو حسين وأنا طاير من الفرحة طاير وقصيت كل أخبار نومتك وعلقتها قدام خشة أم العيال عشان تتأكد أن النوم مع الأثاث الصيني يجيب الذهب ، طبعا الذهب.
لأني سأطالب المنظمين في بكين بمنح الدحيلب الذهبية والفضية والبرونزية مع بعض لأنه أولاً صاحب أشهر نومة في تاريخ الأولمبياد والثانية انه أنقذ سمعة المنتجات الصينية واثبت للعالم أن النوم مع الأثاث الصيني ينسيك العالم وينسيك وين أنت وليش جاي !!..
وما استبعد أن الصينيين يحفرون اسم الدحيلب بالنصب التذكاري للأولمبياد بماء الذهب والله يستاهل ابوحسين.
نومة ابوحسين والله أعلم إنها النومة اللي انكشفت يمكن أبو الشباب متعشي طبق أعشاب البحر بكبسة حاشي وختمها بحليب خلفات واللي كشفه إن نومته ضيعت المشاركة لكن والعلم عند الله أن الربع كلهم تمتعوا بالأثاث الصيني وكلهم شاركوا متلحفين بالبطانيات الصينية الفاخرة.
الصراحة أن الأولمبياد طار علينا لولا الله ثم هالنومة يعني نقدر نقول إننا ولله الحمد طلعنا بميدالية النوم الذهبية بدون منافس ، يعني حتى إخواننا السودانيين ماقدروا يحصلونها وحصلوا ميدالية فضية بكل جداره وتركوا لنا ميداليات النوم العميق !!
وأنا ماعاد باقي عندي كلام غير كلام الفراعنة ...
ويل ويلي شيب عيني طر جيبي ويل حالي.
اللي أتمناه اليوم ويتمناه كل سعودي أن يتم نشر الأرقام المالية اللي صرفت على تجهيز (بعثة النوم) من أولمبياد أثينا حتى اولمبياد بكين ومانبي أي أرقام نبي الأرقام اللي سلمت لرؤساء الاتحادات وكيف صرفت ؟!!!!!
بس بالنهاية ابوالعواكيس ومحفظته هو الكسبان لأن الحلم بميداليات أولمبية حقيقية هو مثل (حلم سعيدان أنه يتزوج أخت مصطفى).