في شيخكم ما تلامون

مرثية في الشيخ عبدالعزيز بن جامع
يا اللي من الأعماق للشيخ تنعون
بعد رزتكم فالفقيد الروازي
يالابتي في شيخكم ما تلامون
النادر الهيلع ثقيل المازي
شيخ.. يبا يبطي وربعه بيبطون
طاو.. ضمايرهم عليهم النحازي
ليت البشر عن نعي الأموات ينهون
إلا فابو خالد ومثله مجازي
لو البكا ما يحيي اللي يموتون
لكن يبين حجم قدر العزازي
طبع البشر عن بعض الأموات يسلون
قدام لا تكمل ثلاث التعازي
ومثل فقيدتنا من الصعب ينسون
ومهما نعزى فيه ما حد بعازي
شيخ ورث مجداً له أحقاب وقرون
مجداً بنوه اباه يوم المغازي
صرح له قباب رفيعات وركون
مثبت ساسه على أرض عزازي
من الزوابع والأعاصير مأمون
دب الدهر ما صار فيه اهتزازي
شادوه سادات على الموت يردون
وعلى عداهم ياخذون امتيازي
رجالهم لا طب في ساحة الكون
من الصطر كنه بحفلة جوازي
ويحجون بأيام الشدايد ويقرون
لا صار بديود المنايح غرازي
واحفادهم مع درب الأجداد يمشون
ما جابهم عن سلم أهلهم نشازي
وتاريخ أبوخالد بالأمجاد مقرون
كله لنا مجد وفخر واعتزازي
من اللي عن حياض الكرامه يذودون
ولهفوة الصاحب ماهوب انتهازي
من طبع ابوخالد مثل ما يقولون
بالطيب يجزا بالردى ما يجازي
يملك مكارم حاتم اللي يعدون
وعلى احنف بن القيس بالحلم فازي
وسره عن الادنى والاقصين مكنون
ولا يستمع دقة جويزي وجازي
ماهوب جسم انسان في شكل بالون
ويدار بالريموت مثل الجهازي
والناس عن دانية واقصاه يدرون
صندوق سره مثل درج القزازي
ويوم ارتحل عقب لنا كل دندون
شبول ليث غابها ما يهازي
بالطيب وبلين الجناب يتمارون
وافعالهم لفعال ابوهم توازي
عسى أبوخالد بين جنات وعيون
ويفيوز حيث الاتقيا الهم مفازي
وصلوا على الهادي عدد ما يلبون
وما هل نون بارقة فالعيازي
شعر/ غازي بن دخيل الله بن عون