بيت وصدى

الاسبوع الماضي كان بيت الاسبوع من طرح الشاعر علي رشيد الرشيد والذي يناقش قضية كثرة الحفريات في مدينة الرياض وضعف انجازها في وقت قصير والبيت يكون:
مشاكل الحفر طالت في نواحي الرياض
في كل حي نجيه نواجه المشكله
وقد كان الصدى من الشعراء:
هيضت يارشيد جرح وسط قلبي وهاض
والناس ماحد يجاوبها على الاسئله
مشاكل الحفر للموتر سواة الحياض
ولا الكفر كل يوم كنه القنبله
يزيد القحطاني
الكل منا على الحاصل لديه اعتراض
وعلى جميع الرجال المدركة تقبله
ياهل العمل منكم الاهمال شفناه فاض
والله ما يرحم انسان مهمل بعمله
مدري متى تنجلي الغمه وياتي البياض
ونشاهد احيا الرياض العاصمة مذهله
سلطان بن حمد ابوشقاف الحبابي
ياما صبرنا ولكن صبرنا اليوم فاض
الى متى الحال واللي يحل هالمسأله
شوارع بعاصمتنا تكتسي بالبياض
كله رمال وحفر وشوارع مهمله
عبدالعزيز محمد اللاحم - الشماسية
بيت وصدى واسمعو بيتي بدون اعتراض
بعيطيكم اللي جميع الناس ما تجهله
ياناس حفريت الشارع علينا افتراض
وشلون نرضى نعيش بهذي المهزله
ضاقت علينا الشوارع والمدن والفياض
وكن الشوارع عليها حصر ومقفله
عبدالله مذكر المطيري
انا لقيت الحفر بعد الدفن بانخفاض
تبقى مطبات والماء زادها مشكله
كم واحد طاح بالحفره كسور او رضاض
ليت المراقب يجي ويغير المشكله
محمد ابو دحيم - البدائع
يسكرون الطريق وصار فيه اعتراض
تحويله وحفرتن من مرها معضله
والماء مروح مع الشارع وصارت فياض
شركات تبدأ بمشروع ولا تكمله
وين الرقابه عليهم ما تحط افتراض
لا صار ماراقبت طرق البلد مهمله
معتاد بن عويش السلمي - الرياض
كثر الحكي ماقصر بالطايلات العراض
وش فيادة حلنا يا طارح الاسئله
لاصار قول المقاول ما عليه اعتراض
ياخذ فلوسه جميع وشغلنا ما كمله
سالم البشري
في كل ما امشي واشاهد حفر جاني امتعاض
وشفت ازدحام الشوارع صارت المعضله
اول نناظر شوارعنا طوال اعراض
اتسر من سار فيها زين مكمله
نبا نتقدم ونرفع بالخطاب اعتراض
على المقاول نشوفه طول المسأله
سعود بن سعد الحافي - الرياض
لو فيه تنسيق ماجاء من حدانا امتعاض
ولاشفت بعض الشوارع جات متواكله
ليت المقاول حسب للشي اسوأ افتراض
حتى ليا من مشيت يزين ممشاك له
وجهة نظر قلتها مهيب نوع اعتراض
ويعيش من في الرياض يحل مشاكله
ابراهيم بن مسمار القحطاني
انت اقتراحك صحيح ولا عليه اعتراض
وليا انتهى مرحله بديت في مرحله
مشاكل الحفر ما تحصى طوال عراض
لكن يا اهل الامانه حلو المعضله
في عاصمتنا الحبيبه ودنا بانتهاض
اذن ينظرلها بأيامنا المقبله
عوض عويض السلمي - الرياض
بيت الاسبوع
تجاوباً مع اقتراح الاخ حمد الوايلي من حوطة سدير حول موضوع كثرة تداول الاعشاب الشعبية واستخدامها من خلال وصفات الطب الشعبي: أرسل عدة ابيات حول هذه القضية من مجموعة شعراء نختار منها هذا البيت للشاعر: فهد عقيل الطويان من بريدة ويقول:
يابايع للناس وصفات الاعشاب
لاجل الطمع ترى العواقب وخيمه
نستقبل صدى البيت بثلاثة ابيات فقط تدور حول هذه القضية على الفاكس
4871070أو الايميل:
khozama@alriyadh.com
أو الايميل:
ashammari@alriyadh.com
مقترح لموضوع بيت الاسبوع القادم:
بعث للصفحة الاخ منصور شليويح العنزي مقترحاً لموضوع بيت الاسبوع القادم وهو قرار منع الاستقدام من دولة بنجلاديش.
ويسرنا بعث مقترحاتكم حول بيت الاسبوع القادم.