صوت الصورة

يا مدرس وسط التلاميذ قاعد
يشرح لهم درسه ويعطي نصايح
والطالب الممتاز له مجد واعد
والطالب الكسلان يقعد يصايح
خالد عبدالله العضياني - الطائف
صورة قديمة في زمان الكتاتيب
أستاذهم يقرا والأطفال حوله
يقرون بالجملة ويقرون ترتيب
وتعلموا للدين فيها وأصوله
محمد عفار المطيري - عنيزة
بداية التعليم من هالكتاتيب
واليوم عم المملكه دون تقصير
الله يطول عمر كل المعازيب
مراحل التعليم تمت بتطوير
علي الغنام - ثادق
مدرس للعلم ومخرج أجيال
على جهود العلم ربي يثيبه
العلم هو العلم فالوقت مازال
ولا صار بالتعليم حاجه غريبه
معتاد بن عويش السلمي - الرياض
يا ما حلا شوف الكتاتيب يا عيد
في نجد ولا في قرايا الحجازي
فيه احترام للمعلم وتوكيد
للعلم .. والأخلاق.. والراس عالي
سعد حمود العصيمي - المجمعة
تميم أنا بوصيك يا خوي وأعلم
أن الشهاده دربها صعب ومهيب
بعد التوكل أبذل الجهد واهتم
ما هو كلام اليوم قول الكتاتيب
محمد بن عبدالعزيز بن محمد التمامي - الرياض
العلم له دوره بيوم الكتاتيب
هذي مبادينا.. وهذي دروبه
عصر الجدود اللي به الصبر والطيب
يا ما حلا ذكراه فيه العذوبه
محمد بن عبدالعزيز الخنيفر - أشيقر
الله وكبر يازمان فات
يوم الدراسه بها كلوفه
وسط الشوارع بلا ماصات
واليوم دولاب ورفوفه
مبارك محمد الدوسري
صَفِّين من طلاب بالمقري تحيط
ذا ماضي التدريس والأكثر نساه
كل شي في بداياته بسيط
بطريقة التدريس وأنواع الحياة
سعود عائش الحربي - القاهرة
درزن عددهم كلهم معهم ألواح
ومطوع في وسطهم يشرح الدرس
هذا زمان راح واليوم أفراح
والحمد لله يومنا نجني الغرس
حمد عبدالله الوايلي - حوطة سدير
ديننا دين التعلَّم والحياة
من زمان ومن عُصوراً ماضاتي
سنة وصَّى بها زين الصفات
محمداً عليه أفضل صلاتي
عبدالكريم عبدالرحمن السلوم - العرائن
شف يا سعد كيف الدراسه منوّل
ما هيب زي اليوم حاسب وباصات
الوقت هذاله زمان تحوّل
من شان تعرف قيمة العلم بالذات
سعود بن سعد الحافي - الرياض
ستة طلاب جالسين وستة واقفين
والمطوع على الكرسي ماسك عصاه
ذولا طلاب في السوق دارسين
والمدرس بينهم ولا أحد عصاه
دامغ محمد الدامغ - روضة سدير
ابن مدفع في درس الكتاتيب
كل معه لوح يكتبه
جالس بوسطهم ويجيب
من علّم حرف لازم نحبه
عبدالعزيز الماجد - الرياض
درس الكتاتيب يا مصوِّر
روَّح ولا عاد نقرا به
العلم هالحين متطوِّر
في ظل حكام وذيابه
محمد بن فهد الجلعود - سميراء
من شفت أنا الصورة هاضت هجوسي
نقضتها جروح وفتحتها عيون
فيما مضى يازين ذيك الدروسي
أيامها كانوا على اللوح يقرون
ماجد أحمد عبدالله الثميري - المجمعة
من قبل سنين التطور والحداثه
هذا نظام دروسنا والمدارس
من بيوت الطين مصدره وانبعاثه
وبالخشب نكتب حروفنا وأنتدارس
خالد سعد السهلي - الدرعية
نسمع بتدريس الكتاتيب من ناس
قالو صدارة علم يقل المدارس
وشفنا المطوّع والتلاميذ جلاس
بصوت الخزامى سبعه بشهر مارس
سعود عبدالعزيز الهزاع - نعام
أواه يا وقت مضى للكتاتيب
يوم الفقر وأيام كُود الدراسه
واليوم ديرتنا رقت بالمعازيب
وصار الولد ينجح ولو طاح راسه
عبدالكريم النغيمشي - الربيعية
يا سلام الله سلام من ضمير سليم
للرجال الي تعرف الهزل وتعرف السمينه
صورة تكي عن التعليم في عصر قديم
قبل ما تبنا المدارس في القرى والا المدينه
ماجد سعود الحريص - عنيزة
اطلب من التلميذ يحفظ كتابه
حتى يصير من الأوايل وممتاز
العلم من دور الانبياء والصحابه
من ضيعه ضاعت أعلومه ولا فاز
فايز فرحان السويلم
@ نستقبل مشاركاتكم الشعرية على الفاكس رقم
4871070أو الإيميل الخاص بصفحة (الخزامى):
khozama@alriyadh.com
زاوية (صوت الصورة) ونعتذر عن قبول المشاركات غير الصالحة للنشر