الطير في جو السما منظره غير في منظره يا زين فردة جناحه

يا طير ما هو ب لك سجن المقيظ
ما ينحسب لك نهارٍ تجلسه
العب بملواحك وْجِعلك حظيظ
فلك هدد: جول عابر تفرسه
تدري وش اللي بمسعانا يغيظ؟
إن زلّ «عشرة» وباقي قرنسه
فيصل الصاعدي - المدينة المنورة
تفكروا في هالصور يا اهل الافكار
حتى الصقر يحتاج في الصيد تدريب
ذي مهنة الصقّار في كل الاقطار
كلّش يبي له قبِل ما يْصير تسبيب
لا تِيّسوا مهما أمام الهدف صار
ترى النجاح يْحصّله راعي الطيب
والصقر له سوقٍ سمعنا له اخبار
مْنظِّمه من يفهم العلم ويْجيب
محمد مقحم المقحم - الرياض
يا طير لا تحرص على الصيد يا طير
تراه فخٍ والمواقف عسيره
بالك تصيد وخلك مواصل السير
يجيك منهو سايق لك بشيره
همّه يصيدك والسعر واضحٍ غير
يجلبك بياع ولايدور خشيره
حمد عبدالله الوايلي - حوطة سدير
الطير في جو السما منظره غير
في منظره يا زين فردة جناحه
والطايره في شكلها منه تصوير
اللي صنعها أثبت النا نجاحه
تنزل على المدرج كما ينزل الطير
والا اقلعت تحتاج وقت ومساحه
سليمان عبدالعزيز السنيدي - الرياض
يا مدربين الصقر تدريب عالي
عساه يا جي بالغنايم لراعيه
الصقر للصقار يقلون غالي
ما فيه طاير فالبراري يجاريه
بين الثريا والثرى له مجالي
طير الحباري دايمٍ من ضحايه
محمد عبدالله الشهري - مكة المكرمة
صورة العدد السابق