يا مصورين الصقر صوره بمقياس اتشوّق اللي بالمقانيص ضاري

أنا شهد ن الصقر غالي ونغليه
شوفه يسر القلب للي يشوفه
الصقر له تاريخ محدٍ بناسيه
دايم له الصقار نفسه شغوفه
كم مغرمٍ بالصقر يا زين طاريه
ذكره مع أهل القنص دوم معروفه
محمد عبدالعزيز الخنيفر - أشيقر
يا مصورين الصقر صوره بمقياس
اتشوّق اللي بالمقانيص ضاري
يا ليت لي صقرٍ من الطير قرناس
يصيد لي بالبر طير الحباري
واجد معه في خايع البر والناس
وارى فجوج الله وذيك الخباري
وأهل المدن في البر ماشي وجلاس
واللي يقطع كبش بأحلى الشباري
محمد عبدالله الشهري - أبها
الطير يا هذال ودّك تهدّه
ودّك تهدّه لجول فيه يصتاد
وإلى هديته بسهلةٍ مجرهده
ضاري على صيد الحبارى بميعاد
وإليا قنص له صيدةٍ قام قدّه
يا حىّ فال الطير لا صار صيّاد
خليف فهيد الحربي - الرياض
طير السعد في مقدم البيت تلقاه
له هيبةٍ يا صاحبي مالها حد
يفخر به القناص من فوق يمناه
وقت القنص اللي به العين تسعد
لا شاف زولٍ للحباري تقفّاه
وجاب السمينه ما هو عنها يتصدد
ما فيه صيده بعالي الجو عداه
إليا انتهض من ماكره ثم سند
خالد ناصر المخيمر -روضة سدير
المدح يضرب وهو مضرب امثال
ذكره مع الشعار في كل ميدان
الصقر ما يخفا على كل رَجّال
دايم له الصقار مغرم وطربان
ريان محمد الخنيفر
لو ربطوا رجْلَيّْ بالحبل وسْبُوقِي
أفكها والعلم عند الحباري
جنحاني ومخلابي وحِدَّة المُوقِي
وحريتي هي ميزتي واختياري
واخلِّي الصقار وجهه طُلُوقي
والغدا مضمون والرزق جاري
ولي موقفٍ للي اشتراني يشوقي
ولي وصف مع افعال اغلى المواري
سعود عائش الحربي - جدة
صقرٍ تشربك اسير وطاح بخيوطه
قامت تلوى عليه وصادته مبطي
حاول يفكه ولكن حيل مربوطه
تكفى يا صقار ليه تعرضه مخطي
حمد عبدالله الوايلي - حوطة سدير
صورة العدد (عدسة / خالد السليمي)